Ттинин жул кказитрайгу, вайми СМИ-рдайгу бувсун буссия, Ма­хIачкъалалив гьар бигьалагай кьинирдай, сайки кIира кьини­сса, Р. ХIамзатовлул цIанийсса куча лавкьуну, бахьттагьалтрансса, мюрщи оьрчIан бигьалаглансса гьарта-гьарзашиву хьунтIиссар тIий. Мукун тIурчагу, иширайну му зат цукун бикIантIиссарив, бувчIлайгу бакъая.
Утти вай ларгсса бигьалагай кьинирдай, Дахадаевлул кIичIира байбихьлахьисса кIаная, Ярагъскийл кучалийн бияннин тихагу, шихагу машинартту бацIан бувну, ххуллу лавкьуну бия. Нагу ттула ишир­ттай бувксса ахттайн бизаннин­сса чIун дия. Ттухьва наварив учав: «Щукру! Машинарттал «пробкарду» бакъар. Укун бикIарча, бучIир», -куну. Ттула мурадругу щаллу бувну, махъунмай шаппай нани ххуллурив ттул, ттул бакъа, ялагу чIявуссаннал, хьуна оьну захIматсса, сситтул ва къащилул аьлла­ли бувсса. Му дия ахттайн чIун. Дия кIиришиву. Маршруткардал тIивтIусса буцири чIавахьулттавух бакъая мурчал хIахIвагу най. БавцIуну бия Котровлул, Марковлул цIанийсса кучарду. ЧIун-чIумуй ххуллу тIивтIуну, ца-кIира метралул тинмай хъанай, ахиргу, цукун-бунугу оьхI-ччаплий бивру Ярагъский кIичIирава ХIамзатовлул цIанийсса кIичIиравун кIура баяй­сса шанбачIулийн. Цикссава бахьттагьалт «неъмат» ласлай бурив ххал бан лавкьусса ххуллийн бурувгукун, чIалай бия га кIиришиврувух къамуксса халкь сайрданий бувккун бушиву. Яла махъ, соцсетирдайхчIин, бувчIуна ахттакьун бизулуву, кIи­ришиву ларгун махъ, «халкь бувкшиву сайрданий ва гай хъинну рязину ва барчаллагьрай бушиву шагьрулул каялувчитурайн». Ахттайн чIумал «пробкардаву» аьллай-лиллай бивкIминнахьгу цIуххин бучIия, рязину ливчIрув ягу къаливчIруву куну.
Шиная шинайн жучIара шай­сса кIирисса гъигу, мурхьирдацIа, щюллишивруцIа бувсса шагьрулул кIичIирттугу хIисавравун лавсун, шагьрулий бувавагу ца гьарта-гьарзасса тротуардугу бу­сса ва хъун кIичIира къалакьирчагу, цукун-бунугу щаллу хьун­ссияв жува.
МахIачкъалаллал администрациялул пресс-службалул бусаврийну, ххуллу лакьлантIиссар тIар гьарца ххуллункьини ссят 8-нния хьхьунил 12-нин ва алхIаткьини ссят 8-нния хьхьунил 10-нин. Му чIумул мутталий шикку шагьрулул хъамаллураща, укунмасса халкьуннаща, оьрчIаща бюхъантIиссар, тIар, скейтбордай, гироскутердай, мюрщи машинарттай, велосипедир­ттай ччамарду буллан, бигьлан, хIаз ласлан. Хъиннува мюрщими ххилай занантIиссар тIар паровозругу.
Га кьини Котровлул кIичIираву «пробкалуву» бавцIуми тIурча, бувагу бигьалаглай бакъая.
Социал сетирдавугу гай гьантрай чансса бакъая, шагьрулул шаннагу район дахIлахIисса ХIамзатовлул кIичIира къалавкьуну, бухмур Ма­хIачкъалаллал, чансса-дунугу рухIгу-ссихIгу яхьусса, Буйнакс­кийл цIанийсса кIичIира лакьин бучIия тIутIисса. Мяйжаннугу, хьхьирицIсса, тинмай Къумукьнал театргу, гилунмай Родопский бульваргу бусса га куча ишла булларча му мурадирал ххуллий, цимилгу ххинугу, ххувнугу бикIанссия.

Залму АьбдурахIманова