ЦIуссалакрал райондалийсса КЦСО (Комплексный центр социального обслуживания населения) райондалий ца яла чялишну зузимур идара бур учирчагу, къабяйкьинссару.
ЛяличIинура хъуннасса хъар лахълай бур балугъравун къабивсса, цIуллу-сагъшиврул ссуссукьусса оьрчIал реабилитациялулсса буллалисса зузалт. ХIакьинусса кьини шикку зузисса 22 инсаннал аякьалулу ур 120 мушакъатсса ва 420 цIуллу-сагъшиврул ссуссукьушиву дусса инсантал. БувчIлачIисса зат бур укунсса оьрчIащал ва миннал нитти-буттащал зун ххишаласса цIимигу, ссавургу, усттаршивугу аьркиншиву. Ци дуссар дунияллий укунсса оьрчIру ххари бавунияр чирисса.
Гьашину ОьрчIру буруччаврил кьини тIайла дарцIунни мубараксса Рамазан зуруйн. Вай оьрчIаха дурсса аякьагу отделениялул зузалтрангу, оьрчIан ххаллилсса байран дан кабакьу бувсса спонсортурангу чирину дацIанссар. Отделениялул зузалтрал аякьалий бур укунсса кIанттурдай гьурттушинна дан къахъанахъисса оьрчIругу. Ми оьрчIругу, шаппа-шаппай лавгун, бахшишру дурну, ххари бунни.
Гьай-гьай, укун бюхттулсса даражалий оьрчIансса байран дан къахьунссия, сахаватлувсса спонсортурал кабакьу къабувссания.
ОьрчIал ва миннал нитти-буттал, отделениялул зузалтрал цIания вайннан барчаллагь баян бунни Центрданул хъунаманал хъиривчу Аьбидат Аьбдуллаевал. Вайнна миннал цIарду:
Кьурбанов Камалуттин, «НОРМО» фирмалул директор; Усттарбеков Вара, «Таис» ООО-лул директор; —— АхIмад, «Золотая вилка» ресторандалул директор; Аьлиев Шамил, «Муравей» ттучандалул директор; ХIусманов МахIаммадхIажи, «Северная промзона» базалул хъунама; Штанчаев Муслим, «Рамас» фирмалул хъунама; Туркнал фирма «Алмар Каспиан»; М. А. Давидов, «Счетмаш-радиотехникалул» хъунама; Аьлиев ХIасан, «888» гостиницардал комплексрал хъунама; Удаманов Заур, 4-мур ччатI шахьай заводрал хъунама.
Про отделение.
Балугъравун къабивсса, цIуллу-сагъшиврул ссуссукьусса оьрчIансса реабилитациялул отделениялул зузалтрал цала биялдарайсса оьрчIан ва нитти-буттан багьу-бизулул, медициналул, педагогикалул хIаллихшиннарду дуллай бур. Отделениялий зий дур янна дуруххаврил, щащаврил, сурат дишаврил, балай учаврил, пластилиндалущал, синааьрщаращал зузи байсса ва цаймигу кружокру.
Шикку зий бур массаж байсса, цIуллу-сагъшиврул физкультура ва профилактикалул давуртту дайсса кабинетру. Му бакъассагу, отделениялул зузалт лаглай бур, нитти-буттан кьатIушав буккан аьркинсса чIумал, миннал оьрчIащал щябикIан шаппа-шаппай.
Аь. Аьбдуллаева
