Ттигъанну МахIачкъалалив хьунни Аьрасатнал регионнай офтальмологиялул кумаг баврил даража ххуй баврицIун дархIусса щалагу Аьрасатнал элмийсса конференция.
Му хас дурну дия шанна юбилейран – Дагъусттаннай яруннил микрохирургиялул центр зий байбивхьуния шиннай 15 шин, Дагъусттаннал ПаччахIлугърал медакадемиялун 85 шин ва офтальмологиялул факультетран 80 шин шаврин.
Гьуртту хьунни муний хьхьичIунсса офтальмологтал, яруннил микрохирургиялул клиникардал вакилтал, Аьрасатнавасса, Азирбижаннавасса ва Индиянавасса фармацевтикалул компаниярттал вакилтал. Конференциялийн бувкIун бия ДГМА-лул студентътал ва щалагу республикалиясса офтальмологтал.
Ихтилатру бунни ДР-лул цIуллу-сагъшиву дуруччаврил министр Танка Ибрагьимовлул, Дагъусттаннал Минздраврал ва щалагу Ухссавнил Ккавкказнал федерал округрал хъунама офтальмолог, Дагъусттаннайсса яруннил микрохирургиялул центрданул директор Аьбдул-хIамид Аьлиевлул, ДГМА-лул ректор Сулайман Маммаевлул, ДР-лул Халкьуннал Мажлисрал цIуллу-сагъшиву дуруччаврил ва социал политикалул комитетрал хъунама Висампаша ХIанапиевлул, ДР-лул ФОМС-рал директорнал хъиривчу Рафик Буттаевлул.
Танка Ибрагьимовлул бувсунни Дагъусттаннай офтальмологиялул кумаг баврил даража ххуйсса бушиву.
«На рязину ура республикалул офтальмологиялул службалул ва яруннил микрохирургиялул центрданул агьалинан дуллалисса хIаллихшиннардал даражалия. Центрданул даврищал кIул хьуну махъ, ттучIа Аьбдул-хIамид Алиевлул хIурмат лавай хьуссар, центр захIматсса тагьардава буккангу бувну, къашайшалтрал вихшалдаран лайкьнугу увккун тIий, — увкунни министрнал.
Аьбдул-хIамид Аьлиевлул кIицI лавгунни центр хьхьичIунмай хьуну бушиву республикалул каялувчитурал ва академик Святослав Федоровлул цила чIумал бувсса кабакьаврийну.
«Гьамин, Святослав Федеровлул ва та чIумалсса Дагъусттаннал цIуллу-сагъшиву дуруччаврил министр Ибрагьим Ибрагьимовлулли гьану бивзсса 1990 шиннардий ва центр тIитIин. ХIакьинусса кьини центр хъанахъиссар элмулул махъра-махъсса хьхьичIуннайшивуртту цайра ххал дигьлагьисса, пишакартурал даража лавай буллалисса ва диплом лавсун махъ ялун ххисса кIулшиву дуллалисса элмийсса клиникалул ккуранну», — увкунни ванал.
Муния махъ конференциялул даврий цала давриву цIу-цIусса кьяйдарду ишла даврия буслай бия медициналул элмулул доктортал, Аьрасатнавасса, Азирбижаннавасса хьхьичIунсса офтальмологтал, Индиянал «Alcon» ва «Вартмана» компаниярттал вакилтал.
Дагъусттаннайсса яруннил микрохирургиялул центр зий байбивхьуссар 2002 шинал октябрь зурул 8-нний. ХIакьинусса кьини центр ккаллину бур щалагу билаятрайсса ва журалул клиникардавасса ца яла хъунмунин ва хьхьичIунмунин. Гьарца шинал шикку ттизаманнул оборудованиялул кумаграцIух буллай бур 6 азаруннийн бивсса операцияртту, 15 шинал мутталий центрданий хъин хьуну ур 300 азара инсан. Идаралул хIакинтурал ишла дуллалисса цIусса технологиярттал сияхIрай дур лазерданул ва ультразвукрал энергия ишла бувну катаракта дукьайсса кьяйда, диабет сававну яруннийн дирсса цIуцIавуртту хъин дуваву.
Зулайхат Тахакьаева
