Майрал 25-нний МахIачкъалалив Хъун дяъвилул ветерантурансса социал аптека тIитIлатIисса шадлугъ хьунни. Шикку гьуртту хьун оьвкуну бия хIурматлувсса ветерантурайн, вайннал оьрчIайн, гъан-маччанайн.

Укунсса аптека тIитIаврил сипташиву дурну дур МахIачкъалаллал ишбажаранчитурал сакиншиндарал «Лагьсса багьрал аптека» тIисса акциялул лагрулий.
«Ветеран» тIисса программалувун багьлагьиссар льготарду ласайсса, социал картарду дусса инсантал. Миннан укунсса аптекардаву 20% кьювкьуну бацIлантIиссар багьайсса даруртту. АптекалуцIун бавхIусса волонтертурал, 4-мур школалул дуклаки оьрчIал, ветерантурачIан биян буллантIиссар даруртту. Вай уква биян буллан цала бакIрайн лавсун бур шагьрулул ца фирмалул.
Шадлугърал хъирив сакиншинначитурал цала хъамаллурайн оьвкуна нахIу-нацIушивурттащалсса ссупралухун ва гьарнан пишкаш бувна хъуни бакъасса «аптечкарду» ва давление дуцайсса приборду.
Цалчинсса социал аптека зий буссар хъуншагьрулул Радищевлул цIанийсса №3 къатраву.

З. АьбдурахIманова