Ларгсса шинал жуятува личIи хьуна щала цилва оьрму оьрчIан кIулшивуртту дулаврин ва ми тарбия баврин хас бувсса ххаллилсса учитель Аьжа Аьбдулгъапурова.

Аьжа бувну бур 1938-ку шинал Ахъушиял райондалийсса Уручуллал шяраву. Буттал шяраву 8 классгу къуртал бувну, ва бувххун бур Дагъусттаннал педучилищалувун. Гагу къуртал бувну, Дагъусттаннал педагогический институтравун був­ххун бур. Дуклай бунува щар хьуну, ванин багьну бур Пермь шагьрулийсса университетравун перевод ласун . Аьжа бия хъинну пагьму-гьунар бусса, дуккавриву итххявхсса. ХьхьичIунну университетгу къуртал бувну, ва зун бивкIуна цинна ххира­сса даврий. Щалва оьрмугу школарттай зий гьан бувну бур.
Ца-кIира шин дурну дур ­Аьжал «Дагъусттаннал правда» кказитрай зийгу. Гай шиннардийгу сентябрьданул 1-нний дакI школалийн кIункIу тIун бур дикIайва тIий, буслан бикIайва Аьжа ХIусайновна. Ва зий бия хьхьичI МахIачкъала шагьрулул 40-мур школалий, муния махъ 22-мур лицейраву. ЧIярусса шиннардий Аьжа ХIусайновна зий бия лицейрал байбихьулул классирттал завучнугу. Га бия хъинну хъирив лавну даву дай­сса инсан.
Хъинну ххирая Аьжа ХIусай­новна дуклаки оьрчIан, чIявуну бучIайва гай цанма ххирасса учительницачIан. Ганингу гайннаха чIалачIин дакъая. Хъунма­сса гъираращал бучIайва Аьжа ХIусайновначIан дарсирдайн ла­кку оьрчIру. Ганин къабувчIайва оьрчIру дарсру кьаритлай бур, маз лахьхьаврихсса гъира ба­къар тIутIисса учительтурал махъругу. Ганил хIарачат байва дуклаки оьрчIан ниттил мазрал ххуйшиву, аваданшиву ккаккан дан. Дуклаки оьрчIан ниттил маз лахьхьаврихсса гъира лавай бан дарсирдай ишла байва мазращал бавхIусса тIуркIурду, тIутIи байва лакку мазрайсса балайрду.
ЦIакьсса дахIаву дия Аьжа ХIусайновнал дуклаки оьрчIал нитти-буттащал, чIяруну дайва гайннащалсса собранияртту. Гьарца шинал ванил, цинявннан ххуй дизанну, тIайла ду­ккайва «Ниттил мазрал байран», хъунмасса гъирарай бучIайва гиккун дуклаки оьрчIал нину-ппугу.
Хъинну ххирая Аьжа ХIу­сайновна архIал зузиминнан, шагьрулий зузисса лакку мазрал учительтуран. Га бия лагма-ялттуминнащал хIал бавкьусса, хIалимсса инсан. Ганил хIурмат лахъсса бия даврил уртакьтурачIагу.
Ванил цIакьсса дахIаву дия Дагъусттаннал учительтурал кIулшиву ларай дайсса институтращал ва Дагъусттаннал педагогикалул элму ахттар дуллалисса институтращал. Ганил эбратрансса дарсру ккаккан дайва щалагу республикалул учительтуран, га бия учитель-экспериментатор.
Аьжа ХIусайновна гьур­тту шайва ниттил мазурдин хас дурсса циняр мероприятиярттавух. Чичайва цила даврия бусласисса хъинну ххуйсса докладру.
Га шагьрулул школарттал 2-мур классрансса лакку мазрал учебникрал авторгу бия.
Гьашинусса дуккаврил шиналгу Аьжа ХIусайновна цинна ххирасса даврийн бувккун буссия, амма цIуллу-сагъшиврулшиврий ганин багьуна даву кьаритан. Га шаппа щябивкIун ца барзвагу къавхьуна.
ЧIярусса ххуйсса цияра­сса дакIнийнбичавурттугу кьариртун, лавгунни Аьжа ХIу­сай­новна. Жун, га кIулсса, ганищал хIала-гьурттуну бивкIсса инсантуран, Аьжа ХIусайновна тачIав хъамакъабитанссар, жул дакIурдиву га сагънува буссар!
С. Р. Мутаева,
П. М. Магьдиева,
Аь. Аь.Тахо-Годил цIанийсса Дагъусттаннал педагоги­калул элму ахттар дуллали­сса институтрал элмийсса зузалт