Февральданул 1-нний республикалул хъуншагьрулул бакIчи Муса МусаевлучIа МахIачкъалаллал агломерациялул хахливусса «Безопасные и качественные дороги» цIанилусса проект ххал дигьлагьисса батIаву хьунни.

З. АьбдурахIманова
Шикку гьуртту хьунни бакIчинал хъиривчутал Камил Изиев, Кьурбан Кьурбанов, ДР-лул Ххуллурдал хозяйствалул Агентствалул хъунаманал хъиривчу Сиражуттин Айгумов, УЖКХ-лул хъунама ХIажимурад Аьбдуразакьов, шагьрулул хъунама архитектор МахIаммадрасул ГитIинов ва цаймигу.
Шикку дакIнийн бутан, Ма­хIачкъалаллал агломерациялул хахливу 2025 шинайннин дансса давур­ттавух ккаккан бувну буссар ххуллурду, бакьин бувну, гьарта-гьарза бан ва бан аьркинсса кIанттурдай цIусса ххуллурду буван. Вай давурттансса арцу итадакьин ккаккан бувну бу­ссар федерал, республикалул ва муниципал бюджетирттава. Программалий ккаккан бувсса куццуй, 2019 шинайннин аварияртту чIяруну шайсса ххуллурду бакьин бан тIий бусса бур. ХIакьинусса кьини мукун бакьин бансса 62 кIану сияхIрайн лавсун бур.
БатIаврий бакIчинал кIицI бувунни программа щурущи дуван хIакьинунин хъуннасса даву дуршиву. Амма чIяруми объектирдансса проектрал ва сметардал даву щаллу хьуну дакъасса дур. Миннуха, тIурча, зун байбишин багьлай бу­сса бур ва шинал март зуруй.
БакIчинал чIурчIав дурунни цумурцагу проект дузрайн дукканшиврийнсса умуд цIакь шайшиву, проектрал хIакъиравусса цимурца чагъардал давуртту щаллу хьуну махъ.
ХI. Аьбдуразакьовлул бувсунни хIакьинунин 350 млн. арцун­сса проектно-сметирттал чагъарду щаллу бувну бушиву. Гьашинусса программалувун лавсун бур мугьлат бакъа бакьин бан багьлагьи­сса шагьрулул кIичIиртту. Ми бур бувавагу 13: Грозненская, Николаевлул, Нахимовлул, Батырайл, ЦIусса Кяхулайрайсса Центральная кIичIиравалу, Чернышевскийл, Титовлул, Маяковскийл, Гогольлул, Богатыревлул, Энгельслул, Ирчи Къазахълул, Орджоникидзел.
БатIаврил гьурттучитурал бувсунни хасъсса давуртту дайдишин гьарма цала-цала кIанттурдай хIадурну ушиву. 2019 шинайннин дувантIисса давурттал хахливу бакьин бу­вантIиссар ххуллурдай­сса, кIи­чIирттавусса бахьттагьалт гьан­сса кIанттурду, светофорду, ххуллуцIсса чапарду. 2019 шиная тиннай дайдишинтIиссар хъуни­сса давуртту. ХIасил, циняр давурттал мурад – ххуллурдай­сса бала-апатIру чан бансса хъанай бур.
Шагьрулул бакIчинал ба­тIав­рил ахирданий цал ялагу тавакъю бувунни анаварсса мутталий чагьардацIун дархIумур даву щаллу дурну, бакIуйн дуккан дан.