КIулсса куццуй, халкьуннал художествалул творчество ва аслийсса культура ядавриву зий, захIмат буллалиминнан «Душа Дагестана» премия дуллалисса конкурс шай гьарца шинал. Республикалул Культуралул министерствалул баян бунни ва шиналмур конкурс.
Бадрижамал Аьлиева
ДакIнийн бутан, «Душа Дагестана» хъанахъиссар региондалул премия, цил прообразнугу хьусса федерал даражалий дулайсса «Душа России» премия. «Душа Дагестана» премия дуллалиссар 2012-ку шиная шиннай конкурсрал гьанулий вай номинациярдаву: «Народный танец», «Народное пение», «Народная музыка», «Традиционная народная культура», «Народный мастер», «Юное дарование», «Народный театр», «Народный музыкальный инструмент».
Дагъусттан Республикалул БакIчи Рамазан АьбдуллатIиповлул бигарданийн бувну, 2015-ку шиная шиннай «Душа Дагестана» премиялия хьуссар ХIукуматрал награда ва мунил лагру лархъссар 100 азарда къурушрайн. Вай шиннардил дянив му наградалун лайкь хьуссар республикалул 31 муниципал сакиншиннараясса 37 инсан, миннавух лакрал районнаямигу.
«Душа Дагестана» премия ласунминнаясса документру кьамул буллалиссар 2017-ку шинал сентябрьданул 1-ннин ва адресрай: 367010, шагьру МахIачкъала, Олег Кошевойл цIанийсса кIичIиравалу, 35 «а», Республикалул Халкьуннал творчествалул къатта МК РД. ЦIуххаву дуван бюхъантIиссар вай телефоннайн оьвкуну: 62-99-87; 62-19-04; e-mail: rdnt35@yandex.ru.
