Аьлиллул душ Бижутиева ХIабибат
Хъуннасса чIун къаларгунни Хьурттал шяраватусса Бижутиев Аьлиллул душ ХIабибат оьрмулул аргъираву аьпалувух бивхьуну. ЗахIматсса цIуцIаврища ххассал бан къавхьунни Хьурттал жяматрангу, му кIулминнангу, чIахху-чIарахнангу бусравсса, ляличIинува дакI-аьмал ххуйсса, инсантурал оь кьинилул ва хъин кьинилул чIарав бацIан анаварсса инсан, кIива оьрчIал нину, цила уздансса багьу-бизулийну ласкъатта бурувччусса хъамитайпа.
1964-кусса шинал лавайсса кьиматирттай МахIачкъалаллал медучилищагу къуртал бувну, ХIабибат зун бивкIун бур цал Гъумуксса азарханалий, яла МахIачкъалаллал центральный азарханалий лаборантну. Микку зий буна, 1973-кусса шинал къуртал бувну бур Дагъусттаннал мединститут. Му шинала ХIабибат бивтун бур студентътурал поликлиникалул ца отделениялул хъунмурну. Ва даврий зий бивкIун бур 20 шинай.
Бусравну бия ХIабибат цищала зузиминнаву. Ванин дуллуну дур чIярусса ХIурматрал грамотартту ва личIи-личIисса бахшишру, дуллуну дур «ЗахIматрал ветеран» тIисса цIа.
Цила ххуйсса цIагу сагъминначIа кьадиртун, ахиратравун лавгунни ххаллилсса лакку хъамитайпа.
ХIабибатлул бивкIулул кьурчIишиву кIидачIлай, дакIнийхтунусса жижара буллай буру ласнахь ХIасаннухь ва махъсса щалагу агьлу-авладрахь. Цил гьав нурданул дуцIиннав, алжаннул ххари баннав.
Хьурттал жямат
МахIаммадлул арс Кьурбанов Рашид
ЦIуцIи шанийгу лахъи къалавгун, оьрмулул 85 шинаву аьпалувух ивхьунни яхI-къириятрал, ас-ламусрал виувцIусса, Хьурттал шяраватусса Кьурванхъал Рашид. Чув зий, чув яхъанай ивкIнугу, ва ия цува лявхъусса буттал шяравалугу, цала Лакку билаятгу, дусталгу, чIахху-чIарахмигу ххирасса инсан.
Къабигьасса диркIун дур дяъви байбивхьусса шинал оьрмулул дахьра 8 шин хьусса Рашидлул оьрчIшивугу, бивтсса оьрмулул ххуллугу. Ванал ппу МахIаммад хушрай аьрайн лавгсса чIумал дялирчIун дур Рашидлул оьрчIшиву. Бигьану бикIанссияв 4 арснал ниттин Ханичан, аьрая зана къавхьусса ласнал хIасратгу дурхIуну, тай захIматсса шиннардий арсру ччаннай бацIан бан. Цала мюрщими уссурвал оькъабукканшиврул, цува хъуна-хъунамагу ухьукун, 9 шин хьусса Рашидлун багьну бур захIматрал ярагъ канил бугьан, аьрайн къабувцуну ливчIсса цала шяраваллил чиваркIуннаву баранбал зун. Мунияту духьунссия мунал канилагу дукъаккайсса сянатру дакъасса, му ия ччарча тIаннул-чарил, ччарча муххал усттар, ччарча заргал.
ЧIун дирукун, лавгуна армиялийн бурж лахъан. КIикку мунаяту хьуну ия сержант, дивизиялул лачIунукку. Лаккуйн зана хьуну, 1959-ку шинал, бувцуну бур щарну Ттуплислив ялапар хъанахъисса НицIавкIуллал шяраватусса, Зина тIисса душ. Гания махъ 40 шинай зий ивкIун ур Гуржиял художествалул предприятиялий, эмаратсса кьуртти, ххаржантру, турду дуллай. Микку мунан дуллуну дур, чIявучин къадулайсса «Гуржиял халкьуннал усттар» тIисса цIа. Рашидлул ва Зинал ца душгу, кIиягу арсгу, цивппа кунма, захIмат ххирану, адав-иман дуну хъуни бувна. Цанма ччикун ялапар хъанайгу бия. Ахиргу, буттал аьрщарайнсса кIункIу тIаву ялтту дурккун, зана хьуна Дагъусттаннайн. Амма Рашидхъал ялун хар-хавар бакъа бала бивуна. Дахьра 35 шинавусса цала буттан цIа дирзсса арс, МВД-лул майор МахIаммад чил канил бивтун увтуна МахIачкъалалив. Тания махъ лавхIуна Рашидгу. Рашидлул бивкIулул лагма лавгминнал тIурчан хIат-хIисав дакъая.
Рашидлул бивкIулул дард-къумашивугу кIидачIлай, дакIнийхтунусса жижара буллай буру кулпатрахь Зинахь, арснахь Мавлудихь, душнихь Маяхь, уссихь Шамиллухь ва махъсса цинявппагу гъан-маччаминнахь!
Рашидлул бунагьирттал аьпа баннав, рухI бигьаний дишиннав!
Хьурттал жямат, дустал, гьалмахтал
ЩайхахIмадлул арс
Загьиров Рамазан
ЦIуцIаврища ххассал ан къавхьуну, аьпалухьхьун лавгунни ххаллилсса лаккучу, яхI-къириятрал заллу, коллективраву хIурмат лавайсса, хьхьичIунсса учитель ЩайхахIмадлул арс Загьирхъал Рамазан.
Рамазан увссар Хъусращиял шяраву. АцIва классгу къуртал бувну, 1970 шинал дуклан увхссар Дагъусттаннал пединститутрал филологиялул факультетрайн. Мугу къуртал бувну, зий айивхьуссар Хъусращиял дянивмур даражалул школалий оьрус мазрал дарсру дихьлай. Зийгу ивкIссар цащала зузисса уртакьтуран эбратранну. Хъиривми шиннардий Рамазан кулпатращал ивзссар Тарумовкалийн. Гикку цал учительну, хъирив завучну зий ивкIссар. Ва даврий ванал чIалачIи бувссар цува даврил сант кIулсса лавайсса учитель ушиву.
Махъсса 30 шинал мутталий Рамазан зий ивкIссар Бакрессливсса дянивмур даражалул школалул директорну. Рамазан лайкь хьуссар личIи-личIисса наградарттан. Ванан дуллуссар «РСФСР-данул просвещениялул отличник» тIисса ва «Дуклаки оьрчIру тарбия баврихлу» тIисса медаллу. Дур ванал чIярусса ХIурматрал грамотарттугу.
Рамазаннул цала кулпат Шакиратлущал хъуни бувссар шама арс ва ца душ. Рамазаннул тачIав щинчIав къаччан бикIан бувшивувагу къакIулли.
ХIайп, иминсса кулпатрал заллу, ххуйсса оьрчIал ппу, цинявннангу ххирасса инсан Загьирхъал Рамазан лавгунни дунияллия.
Ванал бивкIулул хъуннасса кьурчIишиву кIидачIлай, дакIнийхтунусса жижара буллай буру ванал кулпатрахь, арсваврахь, душнихь, уссурссуннахь ва махъсса гъан-маччанахь.
Цал бунагьирттал аьпа баннав, рухI бигьаний дишиннав, Алжан нясив баннав.
Хъусращиял жяматрал цIания АхIмадова Аминат
