Лакрал щархъава агьали шагьрурдайн бизлай, ми кIачIа хъанай дур. ХьхьичIара, ятту-гъаттара лухччайн бакьлай, гьарца кIанттун цIа дикIайссия ишлану. Уттизаманнай хъуругу дугьлай бакъахьувкун, ятту- гъаттарагу шяраваллил кьатIув буккан къабуллай, хъуруннайнма бакьлай, гайми лухччив дачIра личIлай, гайннун цIардура дур хъамаритлай.

Дагъусттаннал Мазрал, литературалул ва магьирлугърал институтрал дачин дурну ду­ссия ми кIанттан цIарду датIаву. Яру­ссаннал сайки циняр цIарду цачIун дурну дур. Жула, лакрал, цIарду датIлай буссия хIарачат бусса лакку хъамитайпа (цIа чичлай бакъару). Институтраву чан бавуртту (сокращенияртту) дуллалиссар тIий, шаппай гьан бувну, цIана мунилсса буллалисса цучIав акъар. Мунияту пикри хьунни му даву кказитрайхчIин дачин дан.
Амма цайминнал анжагъ цIарду датIлай бухьурча, жунна, лакран, му даву дачин дан аьркинни ттизаманнул элму-техникалул даражалий. Мукунсса даражану хъанай бур Гугл (Gool) ишла баву. ХIатта лухччал цIарду хьхьичIрагу ришлай буссия кказит­рай, амма суратру дакъанура, уттирив сурат­ругу, цIардугу цачIун дурну ришлан тIий буру.
Кказитрай ва кказитрал сайт­рай рищавантIиссар лакку кIан­ттурдал суратру. Яла аьркинни миннун цIарду чичин. Жун гьакссагу ххуйну бувчIлай бур му цал дурну къуртал дан шайсса даву дакъашиву. Амма, цимил дарчагу, му къадурну чара бакъассар. Му Буттал кIану ябаврил цIакьсса хIуччар.
Хъунмасса тавакъюри вай кIанттурдан цIарду чичавривух чялишну гьуртту шаву, ми сурат­ру, миккусса кIанттан цIардугу чирчуну, гьан даву кказитрайн ва адресрай: Проспект Петра I, 61, «Илчи» кказитрал редакция ягу электрон адресрай: ilchi@rambler.ru.
Кказитрал ва номерданий ришлай буру Дюкъуллал шяраваллил сурат, ХIасан Аьдиловлул ккаккан дурсса кIанттурдал цIардащал. Тавакъюри Шахьуйннал шяраваллил кIанттурдал цIардугу суратрай ккаккан дурну гьан дуван кказитрайн
Руслан Къардашов