Октябрьданул 19-нний Дагъусттаннал Журналистътурал союзрал конференц-залдануву республикалул СМИ-рдал журналистътуращал хьунаавкьунни шаэр ва публицист Фазир Му­аьллим (Джаферов).

З. АьбдурахIманова
Шикку ванал бувсунни махъсса цаппара шиннардий цува яхъанай ва зий ивкIшиву Финляндиянаву ва Швейцариянаву, ва тийх Ккавкказуллал, хаснува Дагъусттаннал миллатирттал, мазурдих хъуннасса къулагъас душиву ва цан ниттил мазурдий проза чичлачисса жула жагьилтурал произведенияртту таржума бувну, тийхсса халкьуннал дянив машхул буллансса пикри хьушиву.
Бувсунни Фазирдул Европанал хIукуматирттай чIярусса арцурду итадакьайшиву дунияллийсса мюрщи миллатирттал мазру, аьдатру, культура ахттар дуллалисса личIи-личIисса элмурдал пишакартурал хъиривлаявурттан. Щуруй душиву миннуха зузисса проектру ва грант­ру. Ва цувагу ялув кIицI ларг­сса хIукуматирттай зий ивкIун ур ккавкказуллал мазурдийсса произведенияртту таржума бувну, ми бищун хIадур буллалисса проектравух.
-Ттун ччай бур жула миллатирттал мазурдий чичлачи­сса жагьилсса прозаиктурал хавартту таржума бувну, миннал дащуй бихьлахьисса хIакьинусса къизгъинсса масъаларттах ци бургаву дурив ххал дан. Мунийн бувну, жулла ва тайннал обществалуву ми масъаларттах ци къулагъас дурив, миннух цукунсса бургаву дурив кIул бан, — кIицI бунни Фазирдул.
Пресс-конференциялий мукунма гьаз хьунни миллатир­ттал мазурдин багьайсса цайми-цаймигу масъалартту ва буру­ккинтту.
Цинявннал пикри-зикрирду цалийн буцлай, аьмну кIицI лавгунни хIакьину ниттил мазурдийсса творчествалухун багьсса жагьилтуран щаллу дан аьркиншиву бусравсса, сий дусса шартIру. Цаппара шиннардива чIяву миллатру яхъанахъи­сса Дагъусттан ниттил мазурдий чичлачисса шаэртал, чичулт бувавагу бухлавгун къаличIан. Фазир гьурттусса ва проектгу мукунсса жагьилтуран миллатирттал мазурдий чичлан гъира бутансса агьамшиву къачIирисса шари.