Ларгсса нюжмар кьини Апанни Къапиевлул цIанийсса Лакрал музыкалул ва драмалул театрданул тIиртIунни 81-сса сезон. ТIиртIунни му ЦIигьил Камаловлул «Интикьам» пьесалиясса миллатрал виричусса тарихрал, ппухълуннал аькьилшиврул ва чувшиврул аьпа буручлачисса «Хан-Муртазааьли» спектакльданийну.
Спектакль ттинингу цимилвагу ккаккан бувну бушиву хIисав барча, къаоьккину ларгунни цIусса сезон тIитIаву. Мунийн бувкIсса тамашачиталгу мяърипатрал бувччусса, цивппа чун бувкIссарив кIулсса ва миллатрал тарихрал хIурмат бусса бикIай. Спектакль ххарину кьамулгу бай.
Амма спектакль миллатрал виричусса тарихрая, ватандалул бакIрачIан дуркIсса яла оьми кьинирдая, ми кьинирду лайкьну духIан бювхъусса ппухълуннал чувшиврия, яхIирая бусласисса бухьувкун, му театрданул сценалий цимил биширчагу, муния тамашачитал бизар хьун къааьркинссар. Жула ялун нанисса никиран чувшиврул дарсиран ккаллину хьун аьркинссар ва спектакль.
Цимил ххал барчагу, ттунмарив ялагу-ялагу ххал бансса гъира бикIай ва спектакль. Иш ппухълуннал чувшиврул кьуват аьч буллалисса, миллатрал рухI циву дусса Ширвани Чаллаевлул музыка ишла бувну бушиврувугу бухьунссар.
Му бакъасса, спектакльданул мурадгу, мивусса Сурхай-ханнал ва ХIусманнул махъругу хIакьинугу хIакьнува чIалай бур ттун. Ппухълуннал дурхIусса оьсса кьинирдая пикри буллалийни, итталух лаглай дур зур бусса паччахIлугъирттал цалами мурадру чулийн буккан баншиврул цIараву личIан бувсса Гъанмур Баргъбуккавал билаятру. Мина-кIану дакъа ливчIсса тайннал агьлу. Тай дяъвирдавун кIункIу хьуну, ИГИЛ-данул кьюкьраву бири-бат хьуну нанисса жула жагьилсса ватанлувталгу…
ЦIусса сезондалий театрданул ккаккан бан дакIний бур «Малла Насруттин», «Гамлет», «Ханума», «Невыплаканные слезы». ЦIанакул зий бур «Ккурккуллал Щаза» спектакль цIу буккан баврил ялув.
ХIакьину ккаккан бантIиссар «Малла Насруттин», му байбихьлахьиссар 18.30 ссятраву.
ХIадур бувссар
Зулайхат Тахакьаевал
