Жу хьхьичIвагу бувсъссия «Лакку билаят» КПЦ-лул (культурно-просветительский центр) сипталийну лакку маз лахьхьин ччиминнансса курсру тIивтIуну бушиврия.

Лакку маз бухлаган къабитансса мурад хьхьичI бивхьуну бия «Гъази-Гъумучи» фондралгу. КПЦ-лул директор Нураттин Юсупов цувагу ва фондрал ца чялишсса гьурттучи ухьувкун, гьашину кIивагу идара цанний ца бавкьуну пикри бунни ми курсру цачIун бан. БавтIунни цIусса группа. (Курсирдал багьа — зуруй 500 къ.). Курсру шайссар нюжмардий кIийлва (гьарца тталат ва ххуллун кьинирдай 18.30 ссятраву) Р. ХIамзатовлул цIанийсса библиотекалул чIивимур залдануву. Дарсру дихьлай бур цува Нураттин Юсупов ва МахIачкъала шагьрулул 16-мур школалий лакку мазрал дарсру дихьлахьисса, лакрал жяматий­сса иширттавугу цила даврил бутIа бихьлахьисса хIакьсса лакку хъамитайпа ПатIимат Аьлиева.
Уттинин дирхьунни шанна дарс. Цалчинсса дарс дия курсирдайн бувкIминнащал кIул хъанахъисса. КIилчинмур дарс дирхьунни «Инт» кафелуву. Кулпатраву лакку маз сан бакъашиврул, чIивинува ни­ттил мазрая махIрум барчагу, хъуни хъанахъиссаксса дакIниву миллат­рал кIулши чантI тIутIисса лакран миллатрал багьу-бизу асар хьуншиврул ми аслийсса лакку дукрардай хъамалу бан оьвкуну бия шагьрурдай ялапар хъанахъисса лакран ла­кку дукрардал тIин хъамабитан къабитлатисса «Инт» кафелул хъунмур, цила миллатгу ххирасса, дакIгу сахаватлувсса Саида ХIажиевал. Лях-карах жула цIанихсса музыкант Амрет ХIусайнаевлул гармундалухун тIутIисса аслийсса лакку балайрдахун ца дуссухаллил даражалий ларгуна дарс.
Лакку маз бухлаган къабитан­сса цала мурадрая ва даврия буслай, Нураттин Юсуповлул кIицI лавгуна гьантлия гьантлийн, цала бу­ттал минардугу кьариртун, сайки 70 шинал манзилданий щала дунияллийх кIама бивщусса лакрал миллат­рал ялун хъуннасса нигьачIаву най душиву. «Миллатрал дусса яла багьа бакъасса хъус дур аьрщи ва маз. Цимирагу ттуршукулий кьатIаллил билаятирттаясса чапхунчитурал ласун къабивкIсса аьрщи жура кьаритарду. Буттахъал минарду эяллайн дуккан ритарду. Мазгу бухлаглай бур, муний гъалгъа тIутIими гьан­тта бувккуну чан хъанай бухьувкун. Аьрщи ва маз бакъахьурча, миллат бакъассар. Мангъулнал ва къажарнал хъунисса аьраллу ватандалийн ххявххун бивкIсса шиннардийнияр хъуннасса нигьачIаву хIакьину жула миллатрал ялун дирну дур. Цанчирча, я аьрщи, я маз жущава хIакьину зехлай цучIав акъанува, жува буру миннуя махъаллил хъанай. ХIакьину лакрал тагьар мукунсса дур, лакку мазрай гъалгъа тIисса инсан бакIрайн агьарча, вагь, ванан лакку маз кIулсса ххуйну, тIий махIаттал-хIайран хъанахъисса даражалийн бивну буру», — увкуна Нураттин Юсуповлул.
Мяйжаннугу… На гьуртту хьура кIира дарсирай. КьатIаллил билаятрал маз кунма жула ниттил маз лахьлахьисса кIанттайн дуртун дур жура жула ялун нанисса ник. Бигьанугу бакъар оьр­мулул 20 шинаха ливчусса инсантуран ла­кку хIарпру лахьхьин дан. ХIатта «ЧЧАТI» тIисса махъ лахьхьин бангума! Шамилчин­сса дарсирайгу «ЧIАТI» тIийнма бур. ЗахIматну личIи дуллай бур кIилийнусса ва аьш чIарав дусса хIарпру кунния ку, Ь ва Ъ-лишаннащалсса хIарпру, КЪ ва ХЪ хIарпру.
Амма, ци бухьурчагу, мюнпатну лякъинхьуви лакку маз бухлаган къабитан цала хушрай зузисса, миллатрал кIулши чантI увкусса, миллатрал ялун бучIантIимуний аьтIисса инсанталгу, махъ бухьурчагу ниттил маз лахьхьин гъира бумигу жула дянив бушиву.