Медициналул зузалал кьинилул хьунин Катастрофардал медициналул Дагъусттаннал центрданий хьунни Анаварсса кумаграл зузалтран хас дурсса батIаву.

Шикку бахшишру дуллуминнавух бия Катастрофардал медициналул центрданул Лакрал райондалийсса зузала, захIматрал ветеран, цIуллу-сагъшиву дуруччаврил отличник Жарият Аьлишаевагу. ЧIярусса шиннардий бувсса захIматрахлу, инсаншиврул ва пишакаршиврул бурж дакI марцIну биттур буллалаврихлу медициналул зузалтран дуллай бия Дагъусттан Республикалул ЦIуллу-сагъшиву дуруччаврил министерствалул, ЦIуллу-сагъшиву дуруччаврил профсоюзрал Республикалулмур организациялул, Катастрофардал медициналул Дагъусттаннал центрданул администрациялул ва профсоюзрал кIанттул организациялул чулухасса грамотарду. Вайннун лайкь хьуминнал сияхIрай бур Катастрофардал медициналул центрданул Лакрал райондалийсса зузалт Шагьмандара Рамазанов ва Жарият Аьлишаева. Хъамакъабитулунсса бахшишру ва премияртту дуллусса юбиляртуравух бур Дездемона ХIажиевагу.

Ца-кIива махъ учин ччива ва кьини бахшишран лайкь хьусса, 1982-ку шиная шинмай Лакрал райондалул азарханалул Анаварсса кумаграл отделениялий зузисса Жарият Аьлишаевая. Бувну бур Жарият 1963-ку шинал ЧIарадиял райондалийсса Арчиял шяравасса Бадруев Тажуттиннул ва Ххюлуссуннал шяравасса ПатIиматлул кулпатраву Къиргъизнаву, Фрунзе шагьрулий. Махъ вайннал кулпат бивзун бур Къизлардайн. Шикку школагу къуртал бувну, Жарият бувххун бур Къизлардал медициналул училищалувун. 1982-ку шинал, медучилищагу къуртал бувну, кулпатрал хьуну, Лаккуйн бивзун, зун бивкIун бур Лакрал райондалул азарханалул Анаварсса кумаграл отделениялий. Ванил захIматрал луттирай дурагу ца ва чичру дур.

Жарият щар хьунугу бур та чIумалсса Лакрал Райкомрал ца яла жагьилма пишакар, Ххюлуссуннал шяравасса АьбдулхIамид Аьлишаевлун. Вайннал дянив хьуну бур шанма оьрчI, шамунналагу мусил медальлайну къуртал бувну бур Гъумучиял дянивмур даражалул школа. Хъунама арснал Мурадлул ДГУ ва душнил Мадинал ДГПУ къуртал бувну бур ятIул дипломирттай. ЧIивима арснал Тажуттиннул къуртал бувну бур ДГМУ-лул стоматологиялул факультет. Увххун Санкт-Петербурглив ординатуралувун, къуртал бувну вагу ятIул дипломрай, ялапар хъанайгу, зийгу ур вава шагьрулий.

Ва ххаллилсса кулпатрал заллу АьбдулхIамид ур райондалулгу, миллатралгу патриот. АьбдулхIамид зий ивкIссар, лавайгу увкусса куццуй, КПСС-рал Лакрал райкомрай, махъ – райондалул «Ххяххабаргъ» кказитрал редакторнал хъиривчувну, Пенсиярттал фондрай. Пенсиялийн увккун махъ ванайн тапшур бувссар райондалул информагентствалул сетьрал издание, дукIунин ва уссия му изданиялул хъунама редакторну.

Жариятлул чIяру наградарттаву дур Аьрасатнал ЦIуллу-сагъшиву дуруччаврил министерствалул чулухасса ХIурматрал грамота, «Дагъусттан Республикалул цIуллу-сагъшиву дуруччаврил отличник» лишан, «ЗахIматрал ветеран» цIа, Дагъусттаннал ХIукуматрал ва ЦIуллу-сагъшиву дуруччаврил министерствалул чулухасса, Райондалул администрациялул ва хъунмур азарханалул чулухасса грамотартту, Барчаллагьрал чагъарду.
Ванинсса яла хъуннамур бахшишнугу, буллалисса захIматрансса яла лахъмур кьиматнугу бур къашайшалтрал чулухасса барчаллагьрайсса махъру. Медициналул зузалал кьини Жариятлул телефон кьадиркIсса мутта хьушивугу къакIулли.

Жугу, барча тIий Жариятлухьгу, райондалул медициналул идарарттай зузисса махъсса цинявннахьгу пишакаршиврул байран, чIа тIий буру дуллалимуниву тIайлабацIу, талихI-тирхханну. Зухьхьун ттигу чIярусса шиннардий агьалинал цIуллу-сагъшиврул ялув бацIансса цIуллушивугу, каши-кьудратгу, тавпикьгу дулуннав.

Бадрижамал Аьлиева