ОьрчIан кIулшивуртту дулаврил ва ми тарбия баврил ххуллий хъунмасса захIмат бивхьусса, педагогикалул давриву цIушиннарду дурсса АьФ-лул ва Дагъусттаннал лайкь хьусса учитель, АьФ-лул кIулшивуртту дулаврил отличник, Республикалул педагогикалул ветерантурал ва насихIатчитурал советрал председатель Ваччиял шяравасса Асадуллагьлул арс МахIаммадхIажи Маккуевлул цIа ххуйну кIулссар кIулшивуртту дулаврил сфералуву зузиминнан.
Ва ур 40-нния лирчусса шиннардий кIулшивуртту дулаврил сфералуву зий ивкIсса ххаллилсса учитель. 30-нния лирчусса шиннардий каялувшиву дуллай ивкIун ур Дагъусттаннай ца яла хъунмамурну ккаллисса МахIачкъала шагьрулул 22-мур школалий.
270 учитель ва 3500 дуклаки оьрчI усса, хъунмасса школалул даву анаварсса чIумул мутталий сантирайн рутан бювхъун бур ванаща. Ванал каялувшиву дуллалисса шиннардий, 22-мур школа республикалул хьхьичIунсса школардал сияхIравунгу бувтун, муния ца яла эбратмур школа хьуссар. МахIаммадхIажи Асадуллаевичлул даврил ларайсса ккаккиялун хIисав дан бучIиссар школалий Медико-биологический лицей тIитIаву. Та ппурттуву Дагъусттаннал школардай укунсса лицей так ца вари бивкIсса. Даврил сант кIулсса пишакарнал шанма сменалий дарсру дихьлай бивкIсса школа ца сменалийнгу бувтун, 5 кьини дарсру дишай бувну, учительтурангу, дуклаки оьрчIангу бигьашиву дурну дур. ХIакьинусса кьинигу та школалул хьхьичIуннайшивуртту ванал бивзусса гьанулия най дур. НахIакьдан бакъая МахIаммадхIажи Асадуллаевичлуйн «Дагъусттаннал Макаренко» учайсса.
МахIаммадхIажи дуклакинийва гьунар бусса, кIулшивурттах мюхтажсса жагьил ивкIун ур. Ванал къуртал бувну бур Дагъусттаннал паччахIлугърал университетрал чил билаятрал мазурдил факультет. Институт къуртал буллалисса чIумал, дипломрал даву чирчуну дур МГУ-луву ингилис мазрай. Институт къуртал бувну махъ, Республикалул КIулшивуртту дулаврил министерствалул тIалавшиннарайн бувну, МахIаммаджахIи увцуну ур Дагъусттаннал паччахIлугърал педагогикалул институтрал ингилис мазрал кафедралий зун. Мунияр махъри ванал школалиймур захIматрал ххуллу байбивхьусса.
КIицI лаган, МахIаммадхIажи оьрму-хIал ккавксса, ччимур багьу-бизулия ихтилат бан, насихIат бусан кIулсса инсан ур. Ва хIакьсса патриотри, «Илчи» кказитралгу хъинсса дусри.
Вай гьантрай МахIаммадхIажи Маккуев увсса кьини хъанай дур.
ДакIнийхтуну барчагу уллай, чIа тIий буру цIакьсса цIуллушиву, гьарица дуллалимуниву тIайлабацIу.
Вила кулпатрал, оьрчIал ва миннал наслулул ххари уллай, оьрмулия щалихханнин итаннав!
Андриана Аьбдуллаева
