Августрал 12-нний МахIачкъалалив цилла даву дайдирхьунни Миллатирттал (халкьуннал) творчествалул коллективирттал V-мур съездрал.

Мунивух гьуртту хьун республикалийн бувкIунни Кабардин-Балкьарнавасса, Адыгеянава­сса, Чачаннавасса, Къарачай-Чаргаснавасса, Чувашиянава­сса, Татарсттаннавасса, Башкоторсттаннавасса, Вологодскаллал, Владимирскаллал областирдаясса, Красноярскаялиясса ва цаймигу регионнаясса творчествалул коллективру, цинявппагу 30 коллектив.
Съезд тIиртIунни ДР-лул культуралул министр Зарема Буттаевал, ДР-лул миллатрал политикалул министр Татьяна Гамалейл, Миллатирттал (халкьуннал) творчествалул коллективирттал союзрал президент, Дагъусттаннал лайкь хьу­сса къавтIаврил «Лезгинка» ансамбльданул директор Жамбулат МахIаммадовлул, ва Союзрал исполнительный директор, ПаччахIлугърал академиялул Кубаннал казачий хорданул директор, АьФ-лул культуралул лайкь хьусса зузала Анатолий Арефьевлул.
Съездравух гьуртту хъана­хъиминнал хьхьичI махъ лахълай, Зарема Буттаевал кIицI лавгунни Союз дуршиву Аьрасатнал музыкалул ва къавтIаврил аслий­сса ирсирал хазнарду буруччаву, му буруччавриву творчествалул гужру цачIун баву мурадрай, искусствалул му ара машгьур даву, даврил опыт кIибачIаву мурадрай. Бувсунни Союзравун бухлай бушиву Аьра­сатнал 7 федерал округраясса хьхьичIунсса 25 коллектив.
— Съездрал даву дайдихьлай, барчаллагь учин ччай бура цинявппагу делегатътурахь, дурсса вихшалдарахлу ва чIаравбацIаврихлу. Жу мудангу хIадурссару зущал цачIу зун ва зул коллективру жулла республикалий кьамул буллан. ХIакьину хьунабавкьуну, жухьхьунна дириллай дур хIалу агьамсса масъалартту ва дуван­сса давурттив, перспективартту ххал бигьинсса, даврил опыт кIибачIинсса ва уртакьшиврий­сса зузаву хьхьичIунсса хьуншиврулсса ххуллурду лякъин­сса. Ва съездрайн бувкIминнал сияхIрал буслай бур Аьрасатнал Президентнал цIакь бувсса «Основы государственной культурной политики» щаллу баврил лагрулий жула билаятрал миллатрал искусствалул элиталул хьхьичI цуксса лавайсса даражалул масъалартту бавцIуну буссарив. Пишакарсса творчествалул коллективирттал буржри дуруччин ва хьхьичIуннай дуллан билаятрал рувхIанийсса аваданшиву, чIявумиллатирттал искусство ва культура, дунияллул лагрулий Аьрасат лайкьну чIалачIи буллан.
Аьрасатнал пишакарсса творчествалул коллективирттая тIий, цал уттигу чIурчIав дуван ччай бура искусствалуву зу буллалисса захIматран багьа бищун къашайшиврий, му захIматрайн бувну аьрасатлувтурал жагьил­сса никираву хIасул хъанай бушиврий эстетикалул лавайсса тIин, билаятрал рувхIанийсса ирсирахсса хIурмат, цалва билаятраясса пахру, — увкунни Зарема Буттаевал.
Съездрал делегатътурахь ча бувкру тIисса махъ лавхъунни Татьяна Гамалейлгу. ПаччахIлугърал академический Кубанский казачий хорданул художествалул каялувчи, фольклорист, хорданул дирижер Виктор Захарченкощал телемострайн бувккун, Татьяна Владимировнал баян бунни мунан дуллалишиву ДР-лул Миллатрал политикалул министерствалул ХIурматрал лишан миллатир­ттал дянивсса дакьаву ва цашиву цIакь дуллалаврихлу.
Гихуннай заседаниялул ла­хъишиврий ххал бивгьунни личIи-личIисса масъалартту, миннувух 2030 шинайннин кьамул був­сса «Аьрасатнал Федерациялул паччахIлугърал культуралул политикалул Основардаву ва Стратегиялуву» кьамул бувсса агьамми положениярттугу.
— ДакI ххари хъанай дур Союз гьарта-гьарза хъанай душиврия, чIявусса миллатру бу­сса жулла ватандалул личIи-личIисса кIанттурдаясса коллективру мунил кьюкьравун бухлай бушиврия. Жулва хьхьичI хIакьину бавцIуну буссар хъуни-хъунисса масъалартту, миннувувух Аьрасатнал Федерациялул халкьуннал цашиву хIура дуккавугу, рувхIанийсса хазнарду бакъа хъанай, бяхлай бушивугу, — увкунни Жамбулат МахIаммадовлул.