Лакрал райондалул администрациялий хьунни цIуну бувчIусса Жяматийсса палаталул цалчинсса батIаву. Муний гьуртту хьунни райондалул бакIчи Зураб Куччаев, ванал хъиривчу Малик ХIусманов, депутатътурал собраниялул хъунама Явсупи ХIамзаев.

Цалчинсса батIаврийн увкIун ия ацIния мукьа вакил, вайннава арула райондалул бакIчинал ккаккан увсса, арула – депутатътурал увчIусса.
Зураб Куччаевлул кIицI лавгунни кIанттул агьамшиву дусса мурадру биттур баврил ххуллий Жяматийсса палаталул даврил хъунмасса бияла бушиву ва му кIанттул цилакаялувшиндарал органнащал цIакьсса дахIаврий зун багьлай бушиву.

Явсупи ХIамзаевлул бувсунни Жяматийсса палаталул даврия. Жяматийсса палаталул вакилтуралгу бувсунни цивппа хIадурну бушиву райондалул оьрмулувугу чялишсса гьурттушинна дуллай, кIанттул агьалинал оьрму къулай баврил ххуллий зузи дуллалисса сиптардангу кабакьу буллан.
Муния махъ цинявннал чIурду ца бувну, увчIунни Жяматийсса палаталул хъунама. Му хьунни Магьди Айналов. Ванал хъиривчуталну бивтунни Шяпи Шурпаев ва Ширвани МахIаммадов.

Магьди Айналовлул бувсунни райондалул оьрму ххуй баврил ххуллий дан дакIнийсса давурттая. Aгьамсса ххуттай кIицI лавгунни кIанттул агьалинащал дахIаву дуну, маслихIат ккаклай зун багьлай бушиву. Ванал оьвчаву дунни Жяматийсса палаталул члентурайн хьхьичI бихьлахьисса сиптардаву чялишсса гьурттушинна дуллан, умуд бивхьунни уртакьшиврийн. Ихтилат къуртал буллай, Айналовлул бавтIцириннахь барчаллагьгу куну, чIа увкунни тIайлабацIу.
Муния махъ ххал бивгьунни агьалинал пикрирдугу хIисаврайн лавсун, чулийн буккан буллан дакIнийсса агьамсса мурадру.

Зулайхат Тахакьаева