Июньдалул 4-нний Москавлив, билаятрал Хъунмайданнив, хьунни луттирдал фестиваль «ЯтIул майдан». Гьар шинах дувайсса ва фестиваль (гьашинумур 12-мурди) хас дурну дия хъунасса шаэр Александр Пушкин увсса кьинилун ва Оьрус мазрал байран-кьинилун. Гьашину­сса шин Аьрасатнал халкьуннал цашиврул шингу духьувкун, фестивальданул байран личIинура лахъа-хъунну дия.

Фестиваль тIитIлатIисса шадлугърай гьуртту хьунни Аьрасатнал президентнал кумагчи, Фестивальданул сакиншиндарал комитетрал каялувчи ва Аьрасатнал Чичултрал союзрал хъунама Владимир Мединский, Луттирду итабакьаврил комитетрал председатель Сергей Нарышкин, Аьрасатнал луттирдал союзрал президент Сергей Степашин ва цаймигу машгьурсса инсантал.

Сайки 400-нниха ливчусса издательствартту гьуртту хъанахъи­сса, Кремлилул чIирттал вив лавсъсса ва фестивальданий Аьрасатнал халкьуннал мазурдийсса луттирдугу бия.
Ца яла уттарашинна думур кIану Дагъусттаннал стенд душиву буслай бия СМИ-лул зузалт. Мероприятиялий гьуртту хьунни Печатьрал ва информациялул агентствалул хъунама (врио) Арсен Юсупов ва ГАУ РД «Даггосиздатрал» хъунама Азнаур Аьбдурашидов. Вайннал «Энциклопедия Победы. Дагестанцы – защитники Отечества» тIисса проектрал презентация дунни. Бувсунни Буттал кIанттул цIанийсса Хъунмасса дяъвилий Ххувшаву ларсун 80 шин шаврин хас бувсса 15 лу итабавкьушиву проектрал лагрулий.
«Эпоха» издательствалул директор Ххадижат ­Кураховал ва «Дагъусттан» журналданул хъунама редактор Марат ХIажиевлул ва цивппа заллусса идарарттал итабавкьусса тамансса луттирду ва журналлу бия.

Ххуйсса гьурттушинна дунни выставкалий Дагъусттаннал Чичултрал союзрал делегациялул. КIицI ларгсса союзрал председатель, дагъусттаннал халкьуннал шаэр Марина АхIмадовал бувсунни «Аьрасатнал халкьуннал уттизаманнул литература» тIисса проектрал лагрулий итабавкьусса Ухссавнил Ккавкказуллал поэзиялул ва прозалул антологиягу миллатирттал литература гьаз дувансса ххуллийсса даву душиву.
Июньдалул 6-нний миллатирттал мазурдийсса поэзиялул Пушкиннул марафондалий гьуртту хьунни Дагъусттаннал Чичултрал союзрал председательнал хъиривчу, лакрал литературалул секциялул каялувчи Супиян Оьмаров.

«ХIакьину МахIачкъалалив, Поэзиялул театрданул хIаятравусса Пушкиннул гьайкалданучIагу хъуннасса байран дуссар. Поэзиялул театр цуппагу Пушкиннул ва Расул ХIамзатовлул цIанийссар. Дагъусттан – поэзиялул караматсса билаятри. ХIакьину зун баянтIиссар Да­гъусттан миллатирттал мазурдийсса назмурду. На нава лаккучура. Зун кIулссар цIанихсса композитор Мурад Къажлаевлул цIа. КIулссар СВО-лул Аьрасатнал цалчинма Виричу НурмахIаммад ХIажимахIаммадовлул цIа, космонавт Муса Маннаровлул цIа. Циняв цIанихсса лакрая къабу­с­лай кутIа банна. Зун цинявннан кIулссар Пушкиннул «КIинтнил ххуллу» тIисса назму. Халкьуннал шаэр Руслан Башаевлул таржума дурсса ва назму на дуккинна лакку мазрай», – увкунни Супияннул.

Вара фестивальданул лагрулий хьунни цамургу ххуйсса даву. Москавливсса Дагъусттаннал Культуралул центрданул ва Постпредствалул вакилтал хьунабавкьунни Дагъусттаннал делегациялущал. Ва хьунабакьаврий «Не просто город» тIисса МахIачкъала, Буйнакск ва Хасавюрт шагьрурдан хас дурсса луттирдал сериялул презентация хьунни. Хъамаллурал бувсунни Къизлардан хас був­сса луттираха зий бушиву цIанакул, вай циняв луттирду республикалул халкьуннал тарих ва культура куртIну лахьхьин даврил ххуллийсса душиву.

«Дагъусттан» МЦК-лул пре­зидент, профессор Арсен ХIу­сайновлул кIицI лавгу­нни Москавуллал агьалинал ва хъамаллурал мудангу къулагъас дикIайшиву луттирдал фестивальданух, информацион технологиярттал, интернетрал замана бухьурчангу, луттирдалмур биялагу цIакьсса бушиву. Дагъусттаннал Постпреднал цалчинма хъиривчу Илдар Къашкъаевлул бувсунни цува фестиваль тIитIлатIисса кьини нугъайнал тарихрая ва культуралия бусласисса луттирдал презентациялийгу, да­гъусттан мазурдийсса луттирду бусса ярмаркалийгу гьуртту хьушиву.

Мариян Илиясовал цIанийсса «Дараччи» фондрал Москавлиймур филиалданул душругу мероприятиялий гьуртту хъанай бусса кIул шайхту, Марина АхIмадовал бувсунни Мариян Илиясоващал цила цIакьсса дусшиву диркIшиву ва мудангу дагъусттаннал культура, литература гьаз дуллали­сса давурттал чIарав бацIайсса инсан бивкIшиву. Бувсунни мукунна цIакьсса дусшиву диркIшиву лакрал шаэр МахIаммад-Загьид Аминовлущал, цуппа Чичултрал союзрай зузисса ппурттуву МахIаммад-Загьид Расул ХIамзатовлул хъиривчуну зий ивкIшиву, гьунар бу­сса ушивруцIун, ялун нанисса шаэртурангу маслихIатрайну кумаг буван ччисса ивкIшиву.
КIицI лавгунни цинма тIай­лабацIу хьушиву лакрал гьунар бусса чичултращал зун. Ва кьинигу, хъиривсса кьинигу «Дагъусттан» МЦК-лул вакилтурал ва Дагъусттанная бувкIсса хъамаллурал хьунабакьавур­ттай цаймигу агьамсса ихтилатру хьунни, уттинин кунма, уттиния тинмайгу кIицI лавгсса центрданул ва Постпредствалул вакилтал Чичултрал союзращал ва творчествалул идарарттащал уртакьну, кIивайннанмагу, агьалинангу мюнпатну зунтIишиву.

ПатIимат Рамазанова