ОьрчIру буруччаврил кьини – яргсса асардал, хъиншивурттал ва чанна лархъсса симаннал байранни. Печатьрал ва информациялул актовый залдануву дакIний личIансса байран дунни республикалул оьрчIансса «Орленок-Дагестан» кказитрал редакциялул.
Хъамаллураву бия ва кIицI лавгсса кказитрал чялишсса юнкорталгу, активистъталгу, вайннал нитти-буттагу. Бия журналистътурал оьрчIругу.
Мероприятие дачин дурну бия кказитрал юнкор МахIаммадбашир Мазгаров ва медиапедагог Оксана Рауде.
ОьрчIру барча бан ва хьхьичIунминнан грамотартту ва цаймигу журалул бахшишру дулун сахIналийн бувккуна наставникталгу. «Дагъусттаннал правда» кказитрал хъунмур редактор Бурлият Токболатовал кIицI лавгуна, журналистнал пиша агьамсса ва агьалинан аьркинсса пиша бушиву, цивппагу ялугьлай бушиву итххявсса, пикри усттарну аьч буван кIулсса журналистътурах.
«Дагмедиалул» хъунаманал хъиривчу Фикрет Бабаевлугу кIицI лавгуна, залдануву щябивкIсса чIава журналистътал чIал къавхьуну Дагъусттаннал профессионал журналистътурал кьюкьравун бучIанссар тIисса умуд бушиву.
ОьрчIру барча бувна Дагъусттаннал Журналистътурал союзрал председательнал хъиривчу Байрам Аьбдуллаевлул, имам Шамиллул цIанийсса Ухссавнил Ккавкказуллал гуманитар колледжрал директор Лилия Казакбиевал ва цаймигу хъамаллурал.
БавтIцириннан хIадур дурну дия ххуйсса программа: викторинарду, сценкарду, назмурду, балайрду.
«Илчи» кказитрал хъунама редактор Руслан Къардашовлущал жул коллективгу гьуртту хьуссар ва байрандалий. Мяйжанссар, жул мюрщисса оьрчIру бакъая жущала буцин. ОьрчIру жуласса, чилсса къабикIайссар буниялттунгу. КIидачIарду оьрчIащал ххаришиву ва жула пишалул уртакьтурал дурсса ххуйсса даврил чIарав бавцIуру.
ПатIимат Рамазанова
