ЦIуссалакрал райондалий хьунни ОьрчIру буруччаврил кьинилун хас дурсса яргсса мероприятияртту. ЦIуссалакрал шяраваллил хъун майдан чIюлу бувну бия байрандалун хасну. Баллай бия музыкалул, шадсса оьрчIал хъяхъавурттал чIурду.

Шадлугърал мероприятие тIитIлай, оьрчIру ва нину-ппу барча буллалисса ихтилат бунни райондалул бакIчинал хъиривчу Султан ХIамзатовлул. Ванал кIицI лавгунни райондалул оьрчIавусса гьунарду.

– Жула райондалий бур чIявусса личIи-личIисса олимпиадарттай, конкурсирттай, фестивальлай ва спортрал бяст-ччаллаву ххув хьусса, гьунарду бусса оьрчIру: музыкантътал, художниктал, спортсментал. ДикIувча цинявннал оьрчIшиву талихI-тирххандарайсса, баллалуча мудангу оьрчIал хъяхъавуртту ва шадсса чIурду, – увкунни ванал. Шадлугърал программа авадансса, яргсса дия. Цала гьунарду ккаккан бунни «Буратино» тIисса детсадрал оьрчIал, райондалул школардал, ДЮСШ-рал, Пионертурал къатлул, Цалчинминнал Суккушиннарал оьрчIал. ЧIюлу дунни байран Культуралул къатлул зузалтралгу.
Ва кьини оьрчIру хъиннува ххари бунни цанна ххирасса мультфильмардал персонажирттал янналувусса аниматортурал. ОьрчIал бунни миннащал тIуркIурду, рирщунни суратру.

ДарчIунни оьрчIайх мороженныйрду ва цаймигу нахIу-нацIурду. Байрандалул лагрулий хьунни аьдатравун дагьсса асфальтрай суратру дишаврил конкурсгу. Цанма-цанма ккаккан бувсса кIанттурдай оьрчIал дирхьунни ябацIансса суратру. Конкурсрай гьуртту хьунни райондалул мяйва школа ва ДПШ (Дворец пионеров и школьников). Цалчинмур кIану бувгьунни Гьамиящиял 1-мур школалул, кIилчинмур – ДПШ-лул ва Чараваллал школалул, шамилчинмур – ЦIуссалакрал ва ТIюхчардал школардал. Сакиншинначитурал дунни оьрчIан унгу-унгусса, дакIний личIансса байран.

Андриана Аьбдуллаева