Майрал 26-нний ЦIуссалакрал райондалул школардайгу хьунни махъра-махъсса занглил байранну. Ва кьини махъра-махъсса занг рирщунни райондалул 23 школалий, 11-мур класс къуртал буллалисса 180 ва 9-мур класс къуртал буллалисса 700 выпускникнан. Цинявппагу школардай дия ляличIисса чIюлушиву.
Шадлугърал мероприятияртту дайдирхьунни Аьрасатнал гимнрахун ттугъ гьаз баврия. Махъра-махъсса занглил шадлугърай гьуртту хьун школардайн бувкIун бия райондалул администрациялул вакилтал, хасъсса аьралий операциялул гьурттучитал ва цаймигу бусравсса хъамал. ОьрчIахь ххуллухъин тIисса ва тIайлабацIусса ххуллу чIа тIисса ихтилатру бунни хъамаллурал, школалул директортурал, классирттал каялувчитурал, цалчинсса учительтурал, нитти-буттал. Выпускниктуралгу дакIнийхтуну барчаллагь увкунни цахьра дарс дирхьусса учительтурахь, ляличIинува кIицI лавгунни буккин-чичин лахьхьин бувсса цалчинсса учительтал, цинярдагу шиннардий цивппа хъаттиралу бувгьуну бивкIсса классрал каялувчитал. Барчаллагь увкунни мудан чIарав бивкIсса нитти-буттахь.
Цалчинмур классрал дуклаки оьрчIал дурккунни выпускниктурахь ххуллухъин тIисса назмурду, буллунни тIутIал кацIру, вайнналгу дунни мюрщиминнан дакIнийбитулунсса бахшишру. Дунни байрандалул яла агьаммур ва яла асар шаймур аьдат: выпускникнал хъачIунтIай щябивкIсса 1-мур классрал дуклаки душнил рирщунни Махъра-махъсса занг. Му ппурттуву хъиннува хъювсул бувккунни выпускниктал, учительтал ва нину-ппу. Школалия личIи хъанахъиминнал итабавкьунни гьаваллавун цала-цала хияллу чивчусса шарду. Выпускниктурал школалул формалий шадлугърал гьурттучитурал кьариртунни дакIний личIансса чичрурду. Цинявппагу выпускниктуран ва хъанай дур цIусса оьрмулул дайдихьу. Уттиния тихуннай вузирдаву, техникумирттаву, колледжирттаву вайннал ласлантIиссар цала язи бувгьусса пишалул кIулшивуртту.
Махъра-махъсса занглил байрандалущал педагогтал, выпускниктал ва миннал нину-ппу барча бунни райондалул бакIчи МаматIи ХIамзатовлул.
– ХIакьинусса кьини гьарицагу выпускникнал оьрмулуву дакIний личIансса кьини хъанахъиссар. Школалий бивзссар зу кIулшивурттал гьану, лавхьхьуссар лагма-ялтту хъанахъимур лаласун, хIисав-сан дан, зула мурад-хияллачIан кьянкьану бачин, захIматсса чIумал цаннал чIарав ца бацIан. Барчаллагь тIий ура зул оьрмулувусса захIматшивуртту ва ххаришивуртту кIидачIлай, дакI данмур буллай мудан чIарав бивкIсса учительтурахь, нитти-буттахь, аькьилсса маслихIатчитурахь ва насихIатчитурахь. Школалий ларсъсса кIулшивурттайну зула-зула хияллайн бияннав. Зува чув бухьурчагу, хъама мабитару зула мархри. Хьуннав зуяту лавайсса даражалул пишакартал, райондалулгу, билаятралгу цIа бюхттул дансса инсантал, – увкунни ванал. Выпускниктал барча буллалисса ва миннан тIайлабацIу, илкинсса ххуллу чIа тIисса ихтилат бунни ЦIуссалакрал райондалул КIулшивуртту дулаврил управлениялул хъунмур Светлана Кудаевалгу:
– ТIайласса ххуллийн бувккун, сивсусса шаттирдай зула хияллачIан бачинсса каши-кьудрат дулуннав. Зуя учительтурал ва нитти-буттал захIмат зия къабансса, школалулгу, шяраваллил ва райондалулгу пахрулунсса инсантал хьуннав, – чIа кунни цила ихтилатраву ванил.
Андриана Аьбдуллаева
