Лакрал райондалий гьашину 11-мур класс къуртал бунни 25 дуклаки оьрчIал, 9-мур класс – 79 оьрчIал.
Гъумучиял школалий 11-мур класс къуртал буллалиминнансса Махъра-махъсса занг рирщунни. Шадлугърал линейкалий гьуртту хьунни 9-мур класс къуртал буллалимигу.
Школа къуртал буллалими барча бан бувкIун бия райондалул бакIчи Зураб Куччаев, ДР-лул Халкьуннал Мажлисрал депутат Марат Илиясов, КIулшиву дулаврил управлениялул каялувчи Сулайман Шахмилов, администрациялул зузалт ва идарарттал каялувчитал, школа къуртал буллалиминнал нину-ппу, гъан-маччами.
Выпускниктал барча буллай Зураб Куччаевлул кIицI лавгунни, школа мудангу бивкIшиву кIулшивур
ттал, тарбиялул ва мяърипатрал кюруну. Барчаллагь увкунни учительтурахь оьрчIан кIулшиву ва тарбия дулаврил ххуллий буллалисса захIматрахлу.
«Ххирасса выпускниктал! ХIакьину зу, оьрмулул агьамсса бутIа махъ кьабивтун, бухлай буру балугъравун. Школа хьуссар зул кIилчинсса ужагъну, дуллуссар зун кIулшивуртту, шикку хьуссар зул оьрмулуву ххарисса ва хъамикъабитансса ишру. Утти зул хьхьичI тIитIлатIитссар цIусса ххуллурду. КIулну бикIияра, ци пиша язи бугьарчагу, зул кIунттихьри бусса райондалулгу, республикалулгу бучIантIимур. Хъит тIутIияра цIу-цIусса кIулшивурттайн, миннуллу зу лавай бантIисса. Кьадарданул чунмай бичирчагу, тачIав хъама мабитари зула мархри. Ххуллухъин баннав зун! Илкинсса хьуннав зул хьхьичIсса ххуллу!», – увкунни ванал.
Школа къуртал буллалиминнан тIайлабацIу чIа увкунни Марат Илиясовлул, Сулайман Шахмиловлул, классрай каялувшиву дуллалисса СултанпатIимат Кьадиевал, цалчинсса учительницахъал Земфира Амировал ва Жамила АьбдурахIмановал, школа къуртал буллалиминнал нитти-буттал цIания АхIмад Сулаймановлул. Ванал барчаллагь увкунни учительтурахь гьарца кьинисса аякьалухлу.
Выпускниктуралгу балайрдайну, шеърирдайну барчаллагь увкунни ацIния цара шинал лахъишиврий цанна кIулшивугу, тарбиягу, мяърипатгу дуллай бивкIсса учительтурахь. Пишкаш дурунни тIутIив.
Ахирданий школалия батIул шаврил ва цIусса оьрмулувун буххаврил лишандалун ссавнийн итабавкьунни шарду. Яла школа къуртал буллалиминнащал ка дургьуну нанисса 1-мур класс къуртал буллалиминнал рирщунни Махъра-махъсса занг. Мероприятие къуртал хьунни къавтIавурттайну ва хъамакъабитулунсса суратру рищаврийну.
Зулайхат Тахакьаева
