Дагъусттаннал парламентрал хъунама Заур Аскандаровлул Республикалул оьрчIал азарханалул онкогематологиялул ва химиотерапиялул чIава къашайшалтрачIан ивну, вайннайх ссайгъатру бавчIунни.

ОьрчIащалсса, нитти-буттащалсса ва медициналул зузалтращалсса ихтилатраву ванал кIицI лавгунни, захIматсса цIуцIаву дахчусса оьрчIру хъин буллалисса кулпатирттал чIарав чара бакъа бацIлан аьркиншиву.
«Хъуннасса даву дуллай бур хIакьину хIакинталгу, дакI цIуцIаврий оьрчIал цIуллушиврул ялув бавцIуну. ХIукуматралгу аьркинсса медикаментирттал ва уттизаманнул технологиярттал азарханарду дузал буван шаймур буллалиссар. Парламентрал депутатътуралгу даву лавайсса даражалийн гьаз дувансса кабакьу буллалиссар. Жу щала Аьрасатнал яла хьхьичIунми хIакинтурайн буккайссару мукунсса чара бакъашиву дусса ппурттуву. Билаятрал хьхьичIунми медициналул центрдащал дахIаву дуссар. Медициналул зузалтрал кIулшивуртту куртI дуллалисса семинарду дувайссар чIун-чIумуй. Укун хIакинталгу, хIукуматрал вакилталгу уртакьну зузисса чIумалли даврил хIасиллугу вихшала дишин буллалисса шайсса», – увкунни ванал.
Байрандалий гьуртту хьун къавхьусса оьрчIачIан палатардавун ивну, мигу ххари бунни парламентрал спикернал.
Шиккува кIицI лаганна, ва ччя-ччяни ияйшиву онкологиялул цIуцIаврил ххяппурттахьхьун биривсса оьрчIачIан ва Аьрасатнал рынокрай бакъасса даруртту лявкъуну, кьатIаллил билаятирттая бучIан бувну, химиотерапия дуллалисса оьрчIру ххассал бувайшиву.

ПатIимат Рамазанова