Майрал 28-нний ГьунчIукьатIрал шяравасса Аьбдуллаев МахIаммад СилахIуттиннул арснан 85 шин хъанай дур!
МахIаммад ур Дагъусттаннай шампанское дуллай байбихьуминнавасса ца, цаллагу хъинну агьамсса гьурттушин дурсса му давриву.
Ванал бувккуну бур Краснодардайсса Политехнический институт, хъиривгу – Пищевой промышленностьрал институт. 1973 шиная шийнай зий ивкIун ур Дарбантуллал шампанское дайсса заводрай. 1982 шинал МахIаммадлул каялувшиндарай заводрай итадаркьуну дур Советское шампанскоелул цалчинсса шуша.
МахIаммадлул ва заводрай зий 45 шин дурну дур. Миннува тамансса шинну хьуну дур заводрал хъунама технологну, директорнал хъиривчуну. Заводрай зузиссаксса хIаллай МахIаммадлул ккаккан бувну бур, цуксса лахъсса даражалул специалистгу, даврил сакиншинначигу цува уссарив.
МахIаммад ГьунчIукьатIрал жяматрал иширттаву хъинну хьхьичIунсса гьурттучигу ур. ЦIана ва ур ГьунчIукьатIрал жяматрал Хъунисриннал советрал хъунама ва ванал мукъух цинявгу хъинну мюхтажну бикIайссар.
Цалва кулпат Изумрудлущал МахIаммадлул, хъунигу бувну, чивун буккан бунни кIия ххаллилсса арс ва ца душ, бур оьрчIал оьрчIру. Ва ур цала хIарачатрайну, даврий икIу, мачча-гъаннал ва гьалмахтурал дянив икIу, хъунмасса хIурматран лайкь хьусса инсан. Ванайн цинявнналагу ххишала дакъа хъуннасса вихшала дикIай.
МахIаммад ур «Дагъусттаннал промышленностьрал лайкь хьусса зузала», «Буттал кIанттухсса ччаврихлу» тIисса медаль ларсъсса инсан, захIматрал ветеран, чIярур грамотартту, барчаллагьрал чагъарду.
Юбилейгу барча дуллай, чIа тIий буру МахIаммадлун цIакьсса цIуллушиву, дакIнийсса мурадру щаллу шаву. Кулпатралгу, оьрчIалгу, оьрчIал оьрчIалгу мудангу ххари уллай итаннав!
Зиябуттин ХIажимирзаев,
Дагъусттаннал лайкь хьусса строитель
