Ларгсса нюжмардий МахIачкъалалив Журналистътурал къатрал конференц-залдануву хьунни цIа дурксса журналист, Аьрасатнал Федерациялул ХIукуматрал премиялул лауреат, ванияр ца шинал хьхьичI жуятува личIи хьусса Алик АьбдулхIамидовлул аьпалун цIа кусса «За правду в профессии» тIисса щалагу Аьрасатнал конкурсрай ххув хьуминнан бахшишру дуллалисса батIаву.
Конкурс дурссар Аьрасатнал Журналистътурал союзрал Дагъусттаннал региондалул отделениялул, меценат Мамед Абасовлул чIарав ацIаврийну.
Ва батIаврий бакIрайра ккаккан дунни Аликлул оьрмулул ва пишалул ххуллиясса документал фильм.
Хъирив ихтилатру бунни Аьрасатнал Журналистътурал союзрал Дагъусттаннал региондалул отделениялул председатель МахIаммад Ибрагьимовлул, Дагъусттан Республикалул Информациялул ва печатьрал агентствалул каялувчинал буржру биттур буллалисса Арсен Юсуповлул, «Дагестанская правда» кказитрал хъунмур редактор Бурлият Токболатовал, политолог, журналист Ханжан Кьурбановлул, «ЧIавалачин» ва «Литературалул Дагъусттан» журналлал хъунама редактор Мурад АхIмадовлул ва чIявусса цайминнал.
Конкурсрайн тIайла дурксса 27 даву ххал диргьуссар мукьра номинациялий. Вайннува «Печатные СМИ» номинациялий цалчинсса кIану бувгьунни Тамирлан Мусаидовлул («Дагестанская правда»), кIилчинмур – Хасайбат Меджидовал («Дагестанская правда»), шамилчинмур – Шамил Ибрагьимовлул («Молодежь Дагестана»). «Сетевые СМИ» номинациялий цалчинмур кIану – МахIаммад-Аьли Хановлухь («Голос степи»), кIилчинмур – Анастасия Расуловахь («Мирмол»), шамилчинмур – жулва лаккудушнихь, Кьубиял шяравасса Мадина АхIмадовахь («Дагестанская правда»). «Телевидение и радио» номинациялий цалчинсса кIану бувгьунни Давид Кумаевлул (ГТРК «Дагестан»), кIилчинмур – Белла АхIмадовал («ННТ»), шамилчинмур – ХIамзат НурмахIаммадовлул («ННТ»). «Блогосфера» номинациялий цалчинмур кIану буллунни блогер Тимур Магомаевлун («Мирмол»), кIилчинмур – Альберт Эседовлун, шамилчинмур – Ариф ХIамидовлун. Алик АьбдулхIамидовлуя «Репортер» тIисса цIанилусса макьала чирчусса журналист ХIажи Илиясов лайкь хьунни хасъсса бахшишран.
Ва кьини ихтилатру буллалими, жюрилуву бивкIми, конкурсрай ххув хьуми кIицI лаглай бия Алик АьбдулхIамидов гьунар бусса, тIайламуний ацIайсса, ццах, нигь дакъасса журналист ивкIшиву, ванал цIаницIун дархIусса конкурсрайнсса даву щаллу дувангу, вайннува язими язи дугьангу бигьану къабивкIшиву.
