Вай гьантрай республикалий дайдирхьунни Дагъусттаннал поэзиялун хас дурсса Дунияллул халкьуннал дянив­сса литературалул фестиваль «Истоки».

Ваний гьуртту хъанай бур Москавлиясса, Якутиянава­сса, Белоруссиянавасса , Гуржистаннаясса ва чIаххувсса регионнаясса хъамал: чичулт, таржумачитал, критиктал, литературоведтал.
БувкIсса хъамаллуран гъарал сававну МахIачкъалалив экскурсия буван къавхьунни, Литературалул музейраву «Халкьуннал цашиву–литературалулгу цашивур» тIисса цIанилу ккуркки стол бунни.
Аьдатрайн бувну, фестиваль дайдирхьунни майрал 18-нний халкьуннал шаэр Сулайман Стальскийл цIанийсса паркраву шаэрнал гьайкалдануцI тIутIив дишаврийну. Тиккура, Яруссаннал театрданучIа, хьунни байрандалул шадлугъ.

«Дагъусттан цашиврул тема мудангу литературалувугу агьаммурну диркIссар. Дагъусттаннал цалчинми шаэртурал – Ятин Аминннул, Ирчи Къазахълул, ХIамзат ЦIадассал, Анхил Мариннул, Кахаб-Росолиясса МахIмудлул, АбутIалиб Гъапуровлул ва Сулайман Стальскийл литературалул цIакьсса гьану ­бивзссар. Жунма лахьхьин бувссар хъуниминнал хIурмат буван, заэвманал чул бугьан, ччатIул кьимат буван. Ва, яла-яларив, хьхьичIун бурувгуну, аькьилшиврий къуццу тIун, жула гуж цашивруву бушиву бувчIин буван», – увкунни ­культуралул ­министр (врио) ­Зарема ­Буттаевал.

Дагъусттаннал Чичултрал союзрал председатель Марина АхIмадовал (Колюбакинал) кIицI лавгунни, дагъусттаннал поэзиялул гьану бивзминнал цала творчествалуву халкьуннал дусшиврул ва хъиншиврул, хъинбалдарал ­темалух къулагъас диркIшиву.
Хъирив кьини фестивальданийн бувкIцири Сулайман Стальскийл буттал шяраву Ашагъа-Сталлай литературалул вечерданий гьуртту хьунни.
Фестивальданул программалий дур Дагъусттаннал цалчинми шаэртуран хас бувсса семинарду, поэзиялул вечерду. Фестиваль къуртал дувантIиссар Дагъусттаннал шаэртурал ва хъамаллурал Дарбантлив Нарын-Къалалий назмурду ккалаккаврийну.

ПатIимат Рамазанова