Арсен Юсупов ттун ччяниява кIулли. Ца цехравассару учирчангу, тIайлассар – кIиягу кказитирттал верстка дуллалисса даврия байбивхьуссару. Ванал издательствалул даврил шачIантту бивтссар лувва-лувмуния яла лахъмур даражалийн ияннин. Ва ххуллу битавривур ванал кьуватгу: Арсеннун ххуйну кIулссар кказитрал даврил мухIлу-хIин, кIулссар соцсетирдайсса постралмур хIалкьазиягу, цалчинмур хIарпирая тIайла хьуну, текст дунияллийн букканнин. КIулссар передача хIасул, сакин дуваврил кьюлтIшивурттугу.
Гьаннайсса, Арсен жуламари, журналистътурал ккуранналувассар. Ванан редакциялул цIуцIикIантту цумирив, кказитирттал зузалтрал, телевидениялул, радиолул ва электрон СМИ-лул зузалтрал цуми масъалартту хьхьичIун ласун аьркинссарив бувчIин буллан къабагьай. Ванан ми циняв къювусса масъалартту хъинну ххуйну кIулну бушивруцIун, иширайну кумаг буван, хьхьичIун лавсъсса масъалартту сантирай бартбигьин хIарачат буллайгу ур. Чичлачиминнал, бусласиминнал чIарав ацIан, харжру лахъ бансса чараннах луглай ур, дакI цIуцIаврий зий ур. Ванан коллектив анжагъ штат бакъар, на тIийкунсса «цаламири», «жуламири», вайннал захIматран лайкьсса хIакьгу бикIан аьркиншиврий дакI дарцIунугу ур.
Ванан ччянива бувчIунни уттизаманнул медиалул мухIлу-хIин: даврил майдан гьарза-гьарта буван аьркиншиву. Печатьрал, аудиолул, видеолул, соцсетирдал, гьарзатрал биялагу, кашигу ишла дурну, СМИ чIирисса холдинг кунна, информация циняр каналлай баян буллай зун аьркиншиву. Укун зурча, тIайлабацIугу хьунтIишиву. Ванал ва бюхъулий, шавкьирай зун аьркиншиврий мукIру бунни медиалул дунияллий зузими, даврил лябуккугу, хIасиллугу хьхьичIунсса хьунни.
Гьамин, ванал хIарачатрайну цIусса бюхъулийн хъит увкунни республикалул «Замана» кказитрал (ва хъунама редакторну зий уссия), ванал сипталийну хIасул дурсса Этномедиахолдинг «Дагестанналул» ва цIана ва каялувшиву дуллалисса Информациялул ва печатьрал агентствалул. Вай шанмагу къуллугърай ва так каялувчинал бигарду бартбигьлай акъаяча, система сантирай зузи дуллай ия, цара-ца даву тикрал дуллалисса къуллугъирттая мурахас буллай, редакция ца кIанай къабавцIуну, бюхъу-хъитлий щуруншиврунсса ххуллурду ккаккан буллай, салкьи хьусса опытгу, кьуватгу, махънин щун дурсса арцугу агьалинан интерес бизансса контентрайн ва зузалтран кумагран тIайла дуллай.
Ялагу хъинну агьамсса, хIисавравун ласунсса кIану: Арсен –халкьуннал культуралул ва миллатирттал мазурдил буруккинттарайсса инсанни. Ванан кIулли, агар жува ми кьиматрайсса ххазинардацIа хьурча, жула медиапространствагу жан-дакI дакъа личIантIишиву ва уникальностьрацIа махIрум хьунтIишиву.
Утти ванаву хасну ххуй дизайми хасиятирттая. Ва хъинну дакI тIиртIусса каялувчи ур. Ванан ххирар мюрш ивкIун, гьармунил вив ухлан, ссаву ци буссарив кIул буллан, хъирив лаллан. Багьандаран, учиннуча «для галочки» царагу давриха зун къаикIай. Дуллалисса даву мудангу куртIну вив увххун, мудангу бюхъу-бажар буну дувай. Цувагу идеярттал генераторди, мудангу цIу-цIусса пикрирду буслан икIай, СМИ-лул даврил майдан гьарза-гьарта буваврил ххуллийсса ва даву аьлтта чIаланну хьхьичIуннай хъит учин дуваву мурадрайсса. Ва ялагу: буллусса махъ бацIан бувай. Вагу нажагьсса хасиятри.
Командалиягу личIину ца-кIива махъ учинна. Арсеннун кIулли цала лагма лаган буван так профессионалтал бакъагу, марцIсса, яхI-намус бусса инсантал. Лидертал бухьурчагу, аьмсса бурхIулттуву цаннацIун-ца бавкьуну зун кIулсса. Укунсса даражалий зузисса чIумалли, аьмсса мурадру ва масъалартту сантирай ва лябуккулий дузал хъанахъиссагу. Ванал чIарав щинчIав цува чIивисса бурману чIалан къаикIайча, цинявгу гьурттусса тIайлабацIулул соавторну чIалан икIай.
Руслан Къардашов
