Уттигъанну МахIачкъала­ллал клиникалул азарханалул (хьхьичIвасса Портрал азархана) травматологиялул ва ортопедиялул отделениялий хьунни цIусса ларайсса технологиярттал операциялул блок тIитIлатIисса шадлугърайсса батIаву.

Ваний гьуртту хьунни Дагъусттан Республикалул цIуллу-сагъшиву дуруччаврил министрнал цалчинма хъиривчув Наби Кураев, Росздравнадзорданул кIанттул органдалул каялувчи Тамирлан МухIаммадов, МахIачкъала шагьрулул бакIчинал хъиривмур Эмилия Раджабова, шагьрулул администрациялул Муниципал къуллугърал ва кадрардал управлениялул начальник Зарема Давудова, ДГМУ-лул факультетский терапиялул кафедралул заведующий Наби Чамсутдинов, «Целитель» клиникарттал каялувчи Шихамир МахIаммадов ва чIявусса цаймигу.
МахIачкъалаллал клиникалул азарханалул хъунама хIакинну ур жула лаккучув, Ккуллал шяравасса Кьурбаннул арс АхIмад Аьлиев. МахIачкъала шагьрулул бакIчи Жамбулат Салавовлул чулуха ванан цIуллу-сагъшиву дуруччаву хьхьичIуннай даврихлу буллунни Барчаллагьрал чагъар.
ЦIуну тIивтIусса блокрая цияварив АхIмад укун тIий ур:
– Ларгсса шинал жул азарханалул базалий бивхьуссар травматологиялул ва ортопедиялул профильданул 10 тах (койка). Гара шинал жу хьхьичIунну щаллу дурссар федерал бюджетрава ларайсса технологиялул медициналул кумаг баврил 100 квота. ЦIуну тIивтIусса ттизаманнул операциялул блокрайну тIурча жуща хьунтIиссар буллалисса операциярттал спектр гьарта-гьарза дуван, мугу, так жулла республикалул инсантуран бакъача, цайми регионнаяминнангу. ЦIусса операциялул блокраву бюхъантIиссар цал архIал кIива захIматсса, ларайсса технологиярттал протезированиялийн, герниопластикалийн ва аьмсса хирургиялийн багьайсса операцияртту буван, – увкунни АхIмад Аьлиевлул.

Операциялул блокрал про­ект дур­ну дур СанПиН-рал (санитарно-эпиде­миоло­гические правила и нормы) ттизаманнул циняв стандартругу хIисавравун ларсун. Ванил арсеналдануву дур артроскопиялунсса эндоскопический стойка, тазобедренный ва никирал суставирттансса протезирттал ттизаманнул оборудование, гужирал системартту, дефибрилляторду ва чIяву функцияртту бусса операциялул столлу. Клиникалул ляличIиссава пахруну бур С-дуга рентгендалул аппарат, цилгу чансса облучение дувайсса ва ляличIисса кьяйдалий (малоинвазивный метод БИОС) муххал конструкцияртту дишин бюхъайсса. Бур мукунма ттизаманнул кьай-кьуйлул щаллу бувсса, операциялия махъ къашайшала цайна цува учIаннин итайсса палата.
Шиккува кIицI лаган, ва клиникалийсса травматологиялул ва ортопедиялул отделениялул хъунаманугу ивтун ур жуна чIявуссаннан кIулсса, цIа дурксса хирург-ортопед Губулов Юсуп МахIмудлул арс.
ЦIусса операциялул блок тIитIлатIисса шадлугъ балайрдайну ва къавтIавурттайну чIюлу дунни творчествалул коллективирттал. Ахирданий цинявппагу лагма лавгунни пуркIу-цIарай бувсса пулав ва цаймигу дукрарду дусса ссупралух.
Ва макьала кказитрай дукканнин, цIусса операциялул блокраву цалчинминнавухсса къашайшалтрай операция бувунни жува кIицI увсса Юсуп Губуловлул.
МахIачкъалаллал клиникалул азархана хъанахъиссар жулла республикалийсса медициналул идарарттаву буссавагу ца федерал даражалул клиника. Шикку тти цIуну тIивтIусса операциялул блокгу хъанахъиссар АхIмад Кьурбановичлул дуллалисса чIярусса давурттавасса цаннил хIасилну.

Бадрижамал Аьлиева