Июль зурул ахирданий Эльбрус зунттуйн лахъан гьан­сса пикри хьуна ттун. Ва ххуллух, архIал ачинмагу акъа, навалу лавгссияв. МахIачкъалалия Терсколлайн, 500-километралул манзилданий лавгра ттула машиналий. На авцIуссияв 3910 метралул лахъшиврийсса Лепрус тIисса приютрай.

Ца-кIира кьини зунттул лахъшиврийн ­аьдат хъанайгу (акклиматизация) ивкIун, шамилчинмур кьини июльданул 30-нний, хьхьунил ссят кIинний авчура зунттуйн лавхъун най. Инсан махIаттал ансса иш бия: цIаннавун бахьлавгсса марххалттанувун бахьлавгсса загълунсса зунттугу, ца-ца багьну цIурттал дурцIусса ссавгу. Ттуяр хьхьичI-махъ нани­сса альпинисталгу бия. Эльбрус зунттул кIидяликIулувун бияннин шану бахчуну бия, цанчирча ххуллийн укканнин шанул ккик учин ттуща къавхьуна. Цукуннугу, шанущалгу иллай, ивунна 5350 метралул лахъшиврийсса кIидяликIулувун. Ми­ккун ияйхту, чансса игьагулавгун, ттик диркIсса бакIларайсса лахъазан лархъун авчура. Му чIумалнин шанугу бакъа хьуна, амма утти бакI цIун бивкIуна, лахъшиву сававрай. Мунияту даругу букан багьуна, цанчирча лахъну зунттаву бакI цIий битан къабучIиссар.
Ахиргу, ссят арунний кIюр­ххил, лавхъра 5642 метра­лул лахъшиврийсса зунттул бакIрайн. Шиккун лахъайхту, гьарзат цIу­цIимургу, къацIуцIимургу хъамариртунни. Дия ца караматсса сурат! Шамилчинна на Эльбрусрал бакIрайн лахълахъисса, амма цалчин хьунни укун хъин­сса гьавалул тагьар: баргъгу бивтун лагмара гьарзат чIалачIисса. Ттининнин лавхъний кIилвагу ттуруллаву бия зунтту, лагмара цичIар къачIалай. Рищав суратругу Дагъусттаннал ттугълищалгу, ГьунчIукьатIрал герб­ращалгу, Дагавтодорданул лишандалущалгу. Муксса ххуйну бияхха зунттул бакIрай, дурагу ца ацIра градус дякъил духьун­ссия, марч тIурча дахьвасса бия. Сайки ссят дував бакIрай. Ттуяр хьхьичI-махъ лавхъссагу зунттул бакIрай ца 15-20 инсан бия, кув ялавай бучIлай, кув дахьа лахълай.
Зунттуя ялавай увчIун най уна, хьунабавкьунни тамансса альпинистал лавай лавхъун нанисса. Гара кьини, ахттакьунай на увчIра Терскол поселокрайн ва гиккусса ттула гьалмахтуращал зунттуйн лахъаву шюшарду. Хъирив кьини щяивкIун машиналийгу, увкIра МахIачкълалийн. ТIайлабацIусса аьрххи хьунни. Цинявннангу цала-цала аьрххирдай тIайлабацIу шаваннав!
Зиябуттин ХIажимирзаев
26.07.2016. — 31.07.2016.