Уттигъанну даврил аьрххилий Гъумукун нани ххуллий бивру ГьунчIукьатIрал шяравасса, 53 шинавусса, фермер АхIмад Исубуттаевлул фермалийн.

Ванал ижаралий ларсун дур 10 гектар аьрщарал, микку дурну дур ферма, ябуллай ур 80 оьл ва 30-нниха ливчусса бярчру. АхIмадлул бусаврийну, ванан хъунмур маэшат хъанай бусса бур оьллу баххаврия, лагаву, нис дуллан зузалт бугьан аьркинну бур, ми яхъанансса къатта аьркинну бур, мунийн бувну цалсса оьллу бахлай ур цанма маэшатран.
ГьунчIукьатIрал аьрщи дусса дур Чараваллил чIаравсса кьасса кIанайгу.

Тиккугу АхIмадлул дурну дур чIири-хъунсса ферма. Майрал ахирданий, гъили дагьсса чIумал, ванал ризкьи биян байсса бур тихун, сентябрьданул ахирданий буцайсса бур махъунмай. Тийх ванал дурну дур «электропастух» – аьрщарал лагма дургьуну муххал ххаллу, миннувух итабакьайсса бур ток, гъаттара ххаллачIан гъан къахьуншиврул. КIинтнинсса лазуни фермернал машан ласайсса дур Бабаюртуллал райондалийсса ГьнчIукьатIрал къутандалия.Жу буллусса суалданухьхьун жаваб дуллай, АхIмадлул бувсунни цува шиккува къаттагу бансса, яла фермалул давриву цаппара дахханашивурттугу дувансса пикри бушиву.

ХI. Аьдилов