Апрель зурул 28-нний МахIач­къа­ла­лив «Россия – моя история» тарихрал паркраву дайдирхьунни «Знание. Первые» тIисса кIулшивурттал федерал марафон. Ва хас дурну дур Аьрасатнал Халкьуннал цашиврул шинан.

Апрель зурул 28-нний МахIачкъалалив «Россия – моя история» тарихрал паркраву дайдирхьунни «Знание.Первые» тIисса кIулшивурттал федерал марафон.
Ва хас дурну дур Аьрасатнал Халкьуннал цашиврул шинан. «Жагьилтал ва оьрчIру» тIисса нацпроектрал лагрулий «Знание» тIисса Аьрасатнал обществалул ва Дагъусттаннал Жагьилтурал министерствалул сакин дурсса мероприятиялий МахIачкъалалив гьуртту хьунни 1200 дуклаки оьрчI ва студентътал. Шадлугърал даражалий тIиртIусса марафондалий ихтилатру бунни Дагъусттаннал жагьилтурал министр, «Историческая память» тIисса «Единая Россия» партиялул проектрал каялувчи Камил Саэдовлул, «Академия Добра» АНО-рал каялувчи АхIмад АьбдурахIмановлул, Щалагу Аьра­сатнал ххассалбувултрал студентътурал корпусрал Дагъусттаннал отделениялул каялувчи Казбек Айдамировлул. Камил Саэдовлул кIицI лавгунни Дагъусттан мудангу личIи-личIисса миллатирттал халкьуннащал бавкьуну оьрму бутлай эбратну бивкIшиву, марафон жагьилтуран цIусса кIулшивуртту ласунсса ва миннавун гьавас бутансса акцияну хьунтIишиву. Мероприятиялий ихтилатру бунни Аьрасатнал Вирттаврал, аьралий корреспондентътурал, «Время героев» программалул гьурттучитурал. Командалул дакI духьурча дунияллул лахъазантту лахъан бюхъайшиву бувсунни олимпий чемпионтурал.

Марафондалул яла асар хьунмур лахIза бия машгьурсса артистка ЖасминнуцIун бавхIусса. СахIналийн увккунни Дарбантлиясса арулла шинавусса Флядин. ЧIивисса оьрмулуву ванал дурсса дугърисса, чумартсса тIул цинявннан ккаркссар соцсетирдаву. Флядиннул дуллуна нитти-буттан къатта бакьин бан, кумаг бан цала цачIун дурну диркIсса арцу(копилка) щинал зарал биян бувсса чIаххувран. Жасминнул бахшиш дунни ванан цIусса копилка.
Шиккува бусан, Дагъусттаннал халкьуннал артистка, Дарбантлив бувсса ва хъунма хьусса Жасминнул цила ласнащал Илан Шордущал 250 миллион буллуссар гъараллал хъунисса зараллу биян бувсса Дагъусттаннал халкьуннан кумагран: щин ялтту ларгун зия хьусса къатри цIу дуккан дан. Мунияр хьхьичIгу Жасминнул щин ялтту ларгун къатрацIа хьусса ца кулпатран кумаг бувссия. Артистка бивунни МахIачкъалаливсса яла хъинну зараллу хьусса кIанттурдайн захIматсса тагьардануву ливчIсса кулпатирттащал хьунабакьин.

– Дагъусттан – ттул дакIнил бутIар, ттул мархрир, ттул оьр­мур. Ттул оьрчIшивугу, жагьилшивугу шиккур ларгсса. Дагъусттаннайн ливксса балаллул чIарах гьан, халкьуннал къюву асар къархьуну, мюхтажнан кумаг къабувну бацIан ттуща къавхьунни, – тIий бур Жасмин. Кумаг бара тIисса тавакъюрду букIлай бур артисткачIан соцсетирдайхчин ва ванил даврил телефоннайн. ЦIанасса чIумал Жасминнул команда зий дур 64 кулпатращал. Кумаг бувну бур 20-нния ливчусса кулпатирттан, 27 кумаг баннин ялугьлагьисса бур.

– Ттул команда дайдирхьуссар инсантуран кумагру буллай бала-апатI хьуну цалчинсса гьантрайва. Жу машан ласлай ва дуллай буру цIусса къатри, цIу дуккан дуллай буру леркьсса къатри. Кумаг буллай буру бувгьусса квартирардах багьа булун, техника, янна-ус ва аьркин дагьлагьимур ласун. Мукунма юридический масъалартту щаллу бан. Хъинну аьркинну бур кумаг чIявусса оьрчIру бусса кулпатирттан, пенсионертуран, мукунма документру бакъана къатри дурсса инсантуран. Жасмин дакI дарцIуну бур, аьрщарайн документру бакъашиву ва къатри дансса ихтияр къадиркIшиву кумаг баврихун дахчин къааьркиншиврий. Цуппа бувкIун, бивсса зараллу цила яруннин ккавккун, зарал бивминнащал ихтилатру бувну, чIалан бивкIунни хьхьичIва-хьхьичI ци кумаг аьркинну буссарив.
ДакIнин бутан, Дагъусттанннал халкьуннал чIарав бавцIуссия артистка коронавирусрал пандемиялул чIумалгу. Барчаллагьри.

Андриана Аьбдуллаева