Хасъсса аьралий операциялия игьалаган увкIсса Жамалуттин Ибрагьимовлущалсса хьунабакьаву хьунни ГьунчIукьатIрал школалийгу.
Ва цувагу Хъун дяъвилул гьурттучи Жамалуттин Ибрагьимовлул арснал арсри. Ванал ппу ХIажибутта тамансса шиннардий илданун бусравну зий ивкIссар шяраваллил СПК-лул хъунаману. Ппугу чил канил жандалуцIа увну, чIивисса оьрмулий ятинну ливчIсса Жамалуттингу хъуна хьуну ур ттаттал чувшивугу, буттал яхIгу дакIниву буну.
Аьралийчунащалсса хьунабакьаврий гьуртту хьунни райондалул бакIчинал хъиривчу Малик ХIусманов, аьралий комиссар Аьли ГъазимахIаммадов, террорданийн къаршисса комиссиялул отделданул каялувчи МахIаммад Гадаев, СВО-лул иширтталсса буллалисса райондалул бакIчинал кумагчи, «Память Гор» тIисса хасъсса аьралий операциялул Ветерантурал ассоциациялул Лакрал райондалийсса отделданул хъунама Ярагъи Дандамаев.
Малик ХIусмановлул кIицI лавгунни, аьралийтурал дуклаки оьрчIащалсса хьунабакьавурттал агьамшиву хъуннасса душиву хъирив нанисса ник ватан ххирану тарбия даврил ххуллий. Аьралий ишру нанисса кIанттурдая бувкIсса ватан дуручлачиминнал ихтилатирттаву хъиннура куртI хъанай душиву буттал улклухсса ччавугу, му буручлачиминнал хIурматгу. Ванал ххи бунни, райондалул бакIчи Зураб Куччаев гьарца ишираву чIарав ацIлай ушиву хасъсса аьралий операциялий талатиминнал ва аьралийтурал.
Ихтилатру бунни Аьли ГъазимахIаммадовлул, школалул директор Малик Къушиевлул, Ярагъи Дандамаевлул, шяраваллил бакIчи МухIад Штанчаевлул, педагог Сиянат Тагьировал. Вайннал барчаллагь увкунни аьралийчунал ниттихь, Тамарахь, бутталмур кIанугу бувгьуну, чумартсса арс тарбия аврихлу, Жамалуттингу ччясса мутталий сагъну-саламатну ужагърайн зана хьуннав кунни.
Аьли ГъазимахIаммадовлул кIицI лавгунни, аьралийтал, цала оьрмулий хIайп къакуну, ватандалул мурадру буручлай бушиву. Жамалуттиннулгу бувсунни аьралий иширттая, архIал талатиминнал чувшивурттая. ЛичIлулну вичIи дирхьуну бия дуклаки оьрчIру аьралийчунах, цIухлай бия хасъсса аьралий операциялийсса оьрмулул шартIирдая, аьралий гьалмахтурая. КIицI лавгунни, укунсса хьунабакьавурттай цанма исват шайшиву хIакьсса вирттал чIаравва бушиву.
