Апрельданул 21-нний, Аьрасатнал кIанттул цила каялувшиндарал зузалтрал пишалул байрандалул кьини, ЦIуссалакрал райондалул делегация гьуртту хьунни «Малая Родина – Сила России» форумрай.
Форумрал кIилчинсса кьини кIанттул цила каялувшиндарал сфералуву зий, муниципалитетирттал даража гьаз бан, агьалинал масъалартту щаллу бан хIарачат буллалисса инсантурал пишалул байрандалийн тIайла дацIавривугу цила иш бухьунссар.
Райондалул хъунама МаматIи ХIамзатов бакIчисса делегациялуву бия ЦIуссамехелтIиял шяраваллил бакIчи Гайрбек Мусаев, ЦIуссаккуллал шяраваллил бакIчи Баграт МахIаммадов, Чапаевкаллал шяраваллил бакIчи Морис МахIаммадов.
Форумрал лагрулий вай гьуртту хьунни районну хьхьичIуннай даврил хIакъиравусса масъалартту гьаз буллалисса сессиярттай. Вай хьунни кIанттул экономикалул даража гьаз баврил, социал сфералул, культуралул ва цаймигу темардайсса. Шикку гьуртту шаврийну делегатътуран цIусса кIулшивуртту ласунсса сант дагьунни. Экспертътурал бувсунни кIанттул масъалартту щаллу бансса чаранная, гьурттучитурал бувсунни дузрайн дурксса проектирдая ва цайми районнайгу ишла дан хьунсса мюнпатсса практикардая. Дискуссиярттая ва мастер-классирттая кумаг хьунни районнал цаппара масъаларттал хIакъиравусса стратегия ххал дигьин, регионнал дянивсса дахIаву цIакь дан.
– ЦIуссалакрал райондалун хъуннасса агьамшиву дусса ишри форумрай гьуртту шаву. Сессиярттай кIул хьумур инфрастуктура ххуй даврил, кIанттул культуралун кабакьу баврил хIакъиравусса цIусса программардал ва проектирдал гьануну хьун бюхъайссар. Ва хъанахъиссар ххишаласса мюнпат буну каялувшиву дансса ва агьалинал оьрмулул даража гьаз бансса хьхьичIунмайсса хъитну, – кIицI лавгунни МаматIи ХIамзатовлул.
Андриана Аьбдуллаева
