Москавлив «Россия» Национал центрдануву хьунни «Малая Родина – сила России» тIисса Щалагу Аьрасатнал муниципал форум.
Муний гьуртту хьунни муниципал сообществалул, федерал ва регионнал органнал 7 азара вакил, мукунма кьатIаллил шагьрурдал администрациярттаясса 60-нниха ливчусса делегатътал.

Форумрай бия Дагъусттаннал делегациягу.
Президент Владимир Путиннул гьаз бунни Дагъусттаннай тIабиаьтрал апатIрал биян бувсса зараллу бухлаган баврил масъала.
Дагъусттаннал бакIчи Сергей Меликовлул ва МахIачкъалаллал мэр Жамбулат Салавовлул бувсунни Дагъусттаннал ялапарлувтурайн бивсса зараллая ва ми бухлаган буваншиврул региондалий дуллалисса давурттая.
Вайннал бусаврийну, зараллу бивсса чIявусса ялапарлувтураща къавхьуну бур цала къатрал документру дузал буван, мунияту хажалатрай бусса бур паччахIлугърал чулухасса кумаг къабанссар тIий. Форумрай паччахIлугърал бакIчинал тапшур бунни ччясса мутталий къатрал документру дузал ­бансса норматив-правалул ххуллурду лякъин ва федерал властьрал органнайн тапшур бунни республикалун аьркинсса кумаг буван.
«Циняв дагъусттанлувтурал цIанияту барчаллагь тIий ура Владимир Владимирович ­Путиннухь, инсантурах аякьа дуллалаврихлу ва тIабиаьтрал апатIрал биян бувсса зараллу бухлаган бансса хIукмурду баврихлу. Щак бакъар яла бюхттулмур даражалий мукунсса кабакьаврийну жущава бюхъантIишиврий ччясса мутталий инсантал къатрал дузал буван», – увкунни Дагъусттаннал бакIчинал.