Балаллувун багьсса Дагъусттаннал агьалинан кумагру буллай бур цайми регионнаясса инсантал, цивппа-цивппалугу.

Цалчинсса кьинира 20000 къуруш кумагран тIайла дурккун дур Къазанная тарихрал элмурдал доктор, профессор, дунияллул культуралул (ЮНЕСКО) институтрал ректор, «Европа-Азия» гуманитар академиялул президент, жяматийсса ишккакку Энгель ТIагьировлул. Ва Аьрасатнал билаятрай машгьурну ур миллатирттал дянивсса иширттал ахттарчу этнополитолог хIисаврай.

«Жунма ккавккунни, ­Дагъусттаннайх кьини ду­ккайхту, чIявусса регионнаясса, кьатIаллил билаятирттаясса инсантал кумаг буван хьхьичIунмай хьунни. «Тооба» платформалул кумаграйну 900 миллион бавтIунни, Аьрасатнаву укунсса даражалул датIаву хьусса тарих бакъар. 300 азара инсан гьуртту хьуну ур ва датIавриву, цалчинсса кьинива 20 миллион бавтIун бур. На ва яла хъунмур жямра кIицI лаглагисса. Гьаннайсса, балаллул инсантал гъан бунни. УчIан шайма увкIунни, къашайма архниява кумаг буван анавар ­увккунни.

Энгель Ризакьовичлулгу цалчинсса кьинива цувагу чIарав ушиву ккаккан бунни, шайсса кумаг бувну. Хъунмасса барчаллагьри кумагру бувцириннан. Хасну ттучIан ттучIанмагу чIявусса инсантал цайми регионная оьвтIий, цIухху-бусу буллай, ци тагьар дуссарив кIул хьуну ччай бия. ДакI цIуцIаву ­дуллай бия, укунсса къулагъас асаргу, бусравгу шайссар», – тIий бур философиялул элмурдал доктор, Дагъусттаннал Гуманитар университетрал теологиялул кафедралул профессор Асият Буттаева.

ПатIимат Рамазанова