Вай гьантрай оьрмулул 80 шинал юбилей кIицI ларгунни, ххаллилсса учитель, тарбиячи, спортсмен учирчагу къабяйкьинссара (ванал 50-хъайсса шинну дурну дур физкультуралул дарсру дихьлай), Маллаев Муса Рамазаннул арснал.
Муса ур СунбатIуллал шяравасса, республикалийгу, райондалийгу ххуйну кIулну бивкIсса цIанихсса уссал усттартал Маллаевхъал агьлу-авладраясса. Ххюва ссийл ца уссу. Маллаевхъул уссал усттартурал сянатрахун багьаннинсса хьхьичIмур ник муххал ххуллул пишакартал бивкIун бур. Мусаллив язи бувгьуну бур оьрчIан тарбия ва кIулшивуртту дулаврил ххуллу ва 50-нния лирчусса шиннардий цала пишалул ххуллий бивхьуну бур хъунмасса захIмат. Педагог-тарбиячинал ххуллийх лавгун бур ванал шанма ссугу. Утти Маллаевхъал агьулдануву шаннагу сфералул лавайсса даражалул пишакартал бур.
– Ттун цIа дирзсса буттауссу Муса ивкIун ур аьрабрай дурккусса, халкьуннан бусравсса адамина. Совет власть дирхьусса чIумал, аьрза бувну 4-5 оьрчIал ялату ссивир увну, зана къавхьуссар.
Малла тIисса ттул ттатта паччахIнал заманнай зий ивкIун ур муххал ххуллий. Дагъусттаннай муххал ххуллул цалчинсса пишакартал СунбатIуллал шяравар бувксса.Ттул ппу Рамазан оьрмулул чIивисса уну, муххал ххуллий паччахIлугърал къуллугърай ацIан ан къахъанай, ттул ттаттан пикри хьуну бур га сянат лахьхьин уссал усттарначIан гьан ан. Мунияр шихунмай Маллаевхъул усру дурухлай, цала производство дачин дурну, иш бавчуну бивкIун бур. Цалчинсса дунияллул дяъви нанисса чIумал Владикавказрай Маллаевхъал бивкIун бур усру дуруххайсса хъунмасса цех. Шагьрулий хIаписартурал госпиталь буну, вайннал усру, хаснура аьралийтуранми, хъинну тIалавну диркIун дур. Аьралуннансса усру къадириллай, царай усру оьлил багьлий дикIайсса диркIун дур. ХIаписартурансса чакмардурив – балчаннул багьлий. Совет властьрал чIумал кулактуран ккалли бувну, цимурца зерххувкун, ттаттагу, ванал уссурвалгу зана хьуну бур Лаккуйн. НЭП-рал чIумал цавай Бакуй, цавай Дарбантлив зий бивкIун бур цала касмулий. Маллаевхъул мукунма зий бивкIссар Ваччавсса Сталиннул цIанийсса артельданийгу. Ва касмулухсса гъира оьтту-ттурчIавух буллуну бухьунссар, ттул арсругу уссахун багьунни. Ттула буттал цIа дирзсса хъунама арснал Рамазаннул буссар МахIачкъалалив «Маллаев» тIисса уссал фабрика. ЧIивима арс МахIаммадгу ваначIа зий ур. Экономистнал ва юристнал кIулшивуртту ларсъсса унугу, мархрал оьвкуну, шиккун кIункIу хьунни. Дянивма арснал Гьаруннулгу цала цех буссар, – буслай ур Муса цала ттаттахъая ва миннал ххуллийх лавгсса арсурваврая.
Цува Муса я муххал ххуллул пишакар къавхьуну, я усру дуруххаврил касму къадургьуну, цамур ххуллийх лавгун ур. Миннуяргу къачанну бусравсса ва сийлийсса. СунбатIуллал школагу къуртал бувну, ва увххун ур Дагъусттаннал педагогикалул институтравун. Школалий дуклакинийва спортрал итххявхсса, физкультуралул дарсру ххирасса Мусал физкультуралул факультет язи бувгьуну бур.1969-ку шинал мугу къуртал бувну, увкIун ур зун Огнилийсса 2-мур школалийн. Ца шинава лавгун ур аьралий бурж лахъан. Зана хьуну махъ ца шинайсса кIава школалийгу зий ивкIун,1972-ку шинал увкIун ур МахIачкъалаллал 1-мур школалийн. ХхюцIалунния лирчусса шиннардий ва школалий физкультуралул дарсру дихьлай, Мусал хъунмасса захIмат бувну бур оьрчIан спортрах гъира бутан, вайннаву му чулухунмайсса гьунар ялун личин бан. ДарсирдацIун дачин дурну ивкIун ур физкультуралул кружокругу. Ва ивкIун ур ОьрчIал ва чIава жагьилтурал спортрал школалул тренернугу. Цува зузисса шиннардий ванал спортрахух гьан бувну бур сайки циняв дуклаки оьрчIру. Муса Рамазанович зузисса шиннардий ванал хIадур бувсса МахIачкъалаллал 1-мур гимназиялул дуклаки оьрчIал мудан хьхьичIунсса кIанттурду бугьайсса бивкIун бур шагьрулул, республикалул даражалийсса спортрал бяст-ччаллаву, спартакиадарттай. ОьрчIан кIулшивуртту дулаврил, ми тарбия баврил ххуллий бивхьусса захIматрахлу лайкь хьуну ур Дагъусттаннал кIулшивуртту дулаврил, Спортрал министерстварттал, шагьрулул администрациялул ва цаймигу идарарттал чулухасса чIярусса наградарттан: хIурматрал грамотарттан, барчаллагьрал чагъардан, дипломирттан. Муса Рамазанович ур Дагъусттаннал кIулшивуртту дулаврил отличник, Аьрасатнал аьмсса кIулшивуртту дулаврил хIурматлувсса зузала. МахIачкъала шагьрулун 150 шин шаврицIун бавхIуну, танийсса мэр Саид Амировлул бахшиш дурну дур ванан цIа кусса ссят. Школалул коллективрачIа ва дуклаки оьрчIачIа ванал хIурмат хъунмасса бивкIун бур. Муса ур ЗахIматрал ветеран.
Чув-адаминан цумурцагу лахъазан лахъан, гьаз хьун бигьассар, агана ттиликIрах дакI тIайласса, вихшала дусса хъамитайпа бухьурча. Мусан му чулухагу тIайлабацIу хьуну бур. ЦIийшатусса бакIралгу, дакIнилгу ххуйсса, бюхъу-бажаргу бусса Лайлия ванан дакI тIайласса оьрмулул дусгу, гьарица иширавусса кумагчигу хьуну бур. Лайлигу циламур даврий хьхьичIунсса пишакар бивкIун бур. Зувиллий ххюра шинай ЖБИ-рал ( железо-бетонных изделий) заводрай зий, мудан жаваблувсса къуллугъирттай бивкIун бур. Мастерная тIайла хьуну, личIи-личIисса цехирдал каялувчинайн бияннин. Ва бур Дагъусттаннал лайкь хьусса строитель. Иминсса, нахIу-хIалимсса Лайли ккавкнал щилчIав къаучинссар ва му сфералуву зузисса инсанни куну. Даврий хъуннасса хъар лархъун бунугу, ласнахсса, оьрчIахсса аякьагу хъисрагу чан хьун къабавцIуну бур. Мусал ва Лайлил оьрмулувусса яла бюхттулмур лахъазаннив цамур дур. Вайннал ххуйсса тарбиягу дуллуну, оьрмулул ххуллийн бивчуну бур ххюва оьрчI. Шамагу арс мархрая, буттал буттахъая нанисса пиша цIу буккан бувну, уссал фабрика тIивтIуну зий бур. «Маллаев» тIисса вайннал фабрикалий дуллалисса усру агьалиначIа тIалавну дур.
Мусал ва Лайлил душру Изаза ва Изагурагу цала-цала давурттай тIалавсса, хIурматрайсса пишакартал бур. Изаза зий бур шагьрулул 2-мур азарханалий, неврологиялул отделениялул хъунмурну. Къашайшалтрал ва даврил уртакьтурал дянив вания ххуйсса цIа дикIай. Ва Дагъусттаннал лайкь хьусса хIакинни. Изагура зий бур Пенсионный фондрай. Ва бур Дагъусттаннал социал сфералул лайкь хьусса зузала. Яла-яла, циняв оьрчIру бур цала нитти-буттал хIурмат бусса, миннал лавай бавцIусса.
Нитти-буттал захIмат дузрайн бувкшиврун ккаллихьунссар оьрчIру тIайлабавцIусса бухьурча. Учин бюхъанссар, Мусал ва Лайлил захIматгу дузрайн бувккун бур куну. ХIакьину ва бавкьусса, цаннан ца бувчIлачIисса, куннал хIурмат кунначIа бусса кулпат цинявппа лагма лавгун, лахъа-хъунну кIицI дуллай бур ххирасса буттал, ттаттал юбилей.
Жугу барча тIий буру Муса Рамазановичлухь увсса кьини. ЦIуллушиву дулуннав, уттиния тихунайгу оьрчIалгу, миннал оьрчIалгу ххари уллай итаннав.
Андриана Аьбдуллаева
