МахIачкъалалив, Р. ХIамзатовлул цIанийсса Национал библиотекалуву, хьунни «Жу буссияв аьрай…» тIисса Дагъусттаннал чичултрал-фронтовиктурал произведенияртту цачIун бувсса антологиялул презентация. Шиккун оьвкуну бия луттиравун багьсса чичултрал оьрчIайн, гъан-маччанайн. Лу сакин бувну бур А.Тахо-Годил цIанийсса педагогикалул институтрал зузалтрал. Итабавкьуну бур Дагъусттаннал бакIчинал грантрал кумаграйну.
Мероприятие дачин дурну бия педагогикалул элмурдал кандидат, доцент, Педагогикалул институтрал оьрус мазрал ва литературалул секторданул хъунмур элмийсса зузала, шаэр, публицист Миясат Муслимова. Ихтилатру бунни Педагогикалул институтрал директор, философиялул элмурдал кандидат Альбина Аруховал, педагогикалул элмурдал кандидат, Педагогикалул институтрал оьрус мазрал ва литературалул секторданул хъунмур элмийсса зузала Заира Мадиевал, аьрабнал дунияллун Дагъусттаннал, оьруснал литература машгьур дуллалисса Ибрагьим Истанбулил. Лу сакин бувминнахь дакIнийхтунусса барчаллагь увкунни Абачара ХIусайнаевлул арснал Камаллул ва Мирза МахIаммадовлул душнил Жамилял.
Сакиншинначитурал бусласимунийн бувну, ва луттирая ххуйсса кумаг хьун тIий бур дагъусттаннал литературалул дарсру дишайсса учительтурангу, литература ахттар дуллалиминнангу, хъуними классирттал дуклаки оьрчIангу. Ва ишла бан хьун тIий бур оьрус литературалул дарсирдайгу, классрал кьатIувсса давривугу.
– Ва жужраву цачIун бувну бур Буттал кIанттул цIанийсса Хъунмасса дяъвилий талан кьисмат хьусса Дагъусттаннал чичултрал, шаэртурал, журналистътурал произведенияртту. Ва чичрулул ххуттардиву яхьусса аьпари. Вай вирттаврал варистал хIакьинугу бур тукунма чувшиврий Ватандалул мурадру буручлай, тукунма щалагу дунияллун исват буллай билаятрал халкьуннал цачIушиврул ласайшиву ххувшавричIансса ххуллу.
Ва лу бур та дяъвилул бардултращалсса хьунабакьаву. Жунма чIалай бур ссал пикрилий ивкIссарив аьраличу гьужумрай ачиннин, ссал рахIат уллай ивкIссарив окопирттаву. Луттираву бур окопирттаву, ккуллардал ккутIари бувсса чагъарданий, буттал кIанттухсса ччавугу, душманнайнсса ссигу хIала бувххун чивчусса шеърирдугу, дунияллухь вирттаврая хьхьичIва-хьхьичI бусан талаталтращал архIал гьужумрай нанисса аьралий корреспондентътурал очеркру ва макьаларттугу, дакIнил куртIнивумур аьч буллалисса чагъарду ва дневникругу, шинну ларгун махъ хьумур балглагисса кьиссардавасса парчригу.
ХIакьинусса кьини ва хъанай бур яла чIявусса чичулт-фронтовиктал цачIун бувсса издание. Шивусса цаппара автортурал произведенияртту цалчин таржума бувну бур оьрус мазрайн. Жун, лу сакин бувминнан, ччай бур зун зула ватанлувтурал чIурду бавну, дяъви – му зула агьлу-авладрал, шяраваллил, Дагъусттаннал, щалагу билаятрал тарихрал бутIа бушиву бувчIуну. Вирттал сагъссар, жунма дакIний буссаксса, – тIий чивчуну бур луттирал хьхьичIмукъуву.
Царай изданиярттайн бувну, дяъвилий бивкIсса 180 азарунния ливчусса дагъусттанлувтурава 35 чичу ур. Миннава 12 зана къавхьуну ур. Хъиривлаявуртту дурну, ва луттиравун 50-нния ливчусса чичулт, шаэртал багьну бур. Миннавух бур лакрал чичулт ва шаэртал Апанни Къапиев, Минкаил Аьлиев, Ибрагьин-Халил Кьурбанаьлиев, Абачара ХIусайнаев, Мирза МахIанмадов, МахIаммад Буттаев, Аьбдул Мирзаев, Абакар Мудунов, Аьлил Амаев..
Андриана Аьбдуллаева
