ЦIуссалакрал райондалий хIасул бувну бур тIабиаьтрал апатIирттая бивсса зараллу бухлаган буллалисса ва цуксса зарал бивну бурив ххал буллалисса хасъсса комиссия. Гужсса гъараллу ларчIун, хъунмасса зарал бивну бур ЦIуссалакрал райондалун, хаснува ЦIуссаккуллал шяраваллийн.
ЦIанасса ппурттуву комиссиялул вакилтал мюрш бивкIун кьимат бишлай бур щинавун бювкьун бивкIсса къатта-къушлин, идарарттан ва инфраструктуралун хьусса зараллан. Сакин дурну дур зараллу хьусса кIанттурдай дуллансса давурттал план. ЦIуссалакрал райондалул бакIчинал хъиривчу Амир Султанов ЦIуссаккуллал жяматращал хьунаавкьуну, бувчIин бувну бур къатран, хIаяттирттан, багъ-бахчалун бивсса зараллан кьимат бищаврил низамрая. Агьалинал гьаз бувсса цинявппа масъалартту аякьалийн лавсун бур МаматIи ХIамзатовлул.
Райондалул каялувчитурал кьамул бувну бур зараллу бивсса инсантуран кумаг бансса чаранну. ЦIанасса ппурттуву райондалий щаллу дурну дур къатран хъунмасса зарал бивсса инсантуран чIумуйну бацIансса ялапаршиннарал шартIру. Агьали хIачIансса щинал ва дукиялул дузал буллай бур, цIу дуккан дуллай бур зарал бивсса инфраструктура. Му бакъассагу, дуллай бур зараллу хьусса инсантуран кумагрансса юридий консультацияртту.
КIулсса куццуй вай иширттацIун дархIусса, захIматсса тагьар хIасул хьуну дур ЦIуссаккуллал шяраву.
– Гъараллу ларчIун ЦIуссаккуллал шяраву шанма-мукьва кIичIиравусса къатри ва ххуллурду щинавун бювкьсса кIанттурду хьунни. Сайки 60 инсан чIумуйну ялапар хьунсса кIанттурдайн биян бувссар. Щиналу ливчIсса кIанттурдая щин дуккан дуллай зий дуссия хасъсса техника ва насосру. ХъунмурчIин жяматрал хIарачатрайну дуккан дунни щин. Бакьин бан багьлай бур гъарал щинал зия бувсса ххуллурду. ХIакьинусса кьини республикалул каялувчитурай бивхьуну буссар зарал бивсса инсантурал масъала, – тIий, буслай ур ЦIуссалакрал райондалул администрациялул бакIчи МаматIи ХIамзатов.
ЦIуссаккуллал шяраваллил администрациялул бакIчи Баград МахIаммадовлул кIицI лавгунни, цIанасса ппурттуву шяравусса тагьар къулай хьуну душиву, жяматран гьарица чулухасса кумаг бувшиву.
– ЦIуссаккуллал шяраваллийн кьини дурксса чIумал шайма шайсса кумагру буллай, арцуйну, дука-хIачIиялийну, лахху-ликкиялийну, лагма лавгун бия. Цикссагу хьунни гуматинар кумаг бувсса ишбажаранчитал ва укунмасса инсантал.
Вай гьантрай 20 тонна хIачIайсса щинал дуркIунни Москавлив ялапар хъанахъисса 2-мур ЦIувкIуллал шяравасса Аьбдулмажидлул арс Арслан МахIрамовлул.
Имара Саидова
