Аьрасатнал Виричу Нур­ма­­хIа­ммад ХIажи­махIа­ммадовлул цIаний­сса «Патриот» тIисса ихIсандалул фондгу байбивхьунни рирщу гъараллайну зараллу бивсса идарарттан кумаг буллай.

Фондрал учредитель Энгельс ХIажимахIаммадовлул тIайла дурккунни цIуллу-сагъшиву дуруччаврил ва кIулшиву дулаврил идарарттансса сурсатру.
«Чапалсса щин дурхсса кIанттурдай ппив хьун бюхъайссар лахъай азарду. Муния буруччиншиврул щин дагьсса азарханарттайн, поликлиникарттайн, школардайн ва детсадирттайн тIайла дуккарду 15 тонна антисептикирттал», – увкунни Виричунал буттал.

НурмахIаммад ХIажима­хIаммадовлул цIаний­сса фонд мудан чялишсса гьурттушинна дуллай буссар гуманитар акциярдавух. ЧIарав бацIлай буссар хасъсса аьралий операциялий чувшиврий жанну дуллуминнал кулпатирттал, аьралий иширттал ветерантурал ва мушакъат хьуминнал.

Зулайхат Тахакьаева