Хъуни марххалттал зунттурдайгума хъякрурду хьун дурну, агьалинал къатрал ялун зунттул лекьрурду дуккан кунмасса кIанттурдугу бур.

Хъинну къабигьасса тагьар хIасул хьуну дия Ккуллал шяравугу. Агьали, зунттуйсса хъякру ххишала хъанай душиву буслай, чичлай бия. Амма Ккуллал агьали, бала бучIавривухва, кIунттил дургьуну чIатIригу, бувккуна лахIунтту хIуен дуллай, гьагълийн кIура даен дуллай.
Жагьилталгу, бугьарамигу, цала тIийкун, чIатIа дугьансса хIал бума увккун, ххюва-ряхва гьантлий зий бивкIунни, пяплил аьттартту къумасса кIичIиравух лувсса ратIничIан бурган буллай.

«Видеортту ккарккунни, сурат дакъарив?», – цIухлай бура на шяраваллил оьрчIал багъраву тарбиячину зузисса Разият АхIмадовайн.
«Буххаврил сурат рищайссавагу акъая. ХъачIрайн хъачI дирхьуну тIисса кьяйдалий, бувккун бия Ккуллал агьлу цаласса цивппа буллай», – тIий бур ва.
«Ккуллал агьлу кумаграх, инженертурал хъунисса проектирдах ялугьлай къабивкIунни, анавархъиндарай дуван аьркинсса даву цала карунних, чIатIрах дуллай булувкьунни. Халкьуннал цала яхI, къицци ккаккан бунни. Гьарца занакьулушиндараву, зузаврил бущилуву ппухълуннал шавкь чIалай дия», – цаламур пикри буслай ур вайннал шяравучу Магьди ЩайхахIмадовгу.
Халкьуннал дакIурдил гъилишиврул марххалтталми зунттурдугу хIаллицIух бассан бувантIиссар. КIанттул власть ва агьали ца хьуну зурча, сантирай ва лябуккулий буккантIиссару вай иширттава.

ПатIимат Рамазанова