Мартрал 31-нний «Дагестан» РИА-лий хьунни Дагъусттаннал ЭкспортрацIун кабакьаврил центрданул директор Руслан Аьппаскулиевлул пресс-конференция. Муний ванал бувсунни ларгсса шинал дурсса давурттал хIасиллая. Рслан Кулиевлул тIимунийну, ларгсса ххюра шинал мутталий Дагъусттаннаясса экспортрал лагрурду гьарза хьуну дур сайки шамлийну.

Ми ккаккияртту тасттикь дурну дур ДР-лул ХIукуматрал председательнал отчетраву.
2025 шинал Экспортрал центр чялишну зий бивкIун бур республикалийн кьатIаллил билаятирттал уртакьтал кIункIу баврил иширттаха. Республикалийн бувкIун бия Алжирнал ва Беларусьнал делегацияртту Дагъусттаннащал хIала-гьурттуну зунсса мурадрай. Дагъусттаннал ишбажаранчитал бизнес-миссиялий лавгун бия Оманнал Султанатрайн.
Руслан Аьппаскулиевлул бувсунни мукунма, чIал бакъа Дагъусттаннал сокру Тайланднавун тIайла дуклан тIий бушиву. ­Ванал тIимунийну, масъала дузал хьуну бусса бур. Утти ливчIун бур щаллу буван так сертификатиртталмур масъала. Микку хъунмур захIматшивуну личIлай дур логистика дузал даву.
Ялагу ххал диргьунни Дагъусттаннай 50 гектарданийсса зайтундалул багъ бансса проект дузал даврил масъала, багъ бувну махъ пикри бусса бур зайтун зана-кьала байсса (перерабатывающий) цехгу буван. Зайтундалул багъру бантIий бур МахIарамкантуллал ва Дарбантуллал районнай. СипталуцIун авкьуну ур республикалул бакIчи Сергей Меликов. Ванал бувсун бур зайтундалул аьгъушиву жула региондалий хъинну тIалавну душиву. Мунил хIакъиравусса ISFA компаниялущал кьутIи-соглашениялий къулбасру дурну дур Петербургуллал дунияллул халкьуннал экономикалул форумрай.
Яла Руслан Аьппаскулиевлул жавабру дуллунни журналистътурал суаллахьхьун.