Апрельданул 2-нний Дагъусттаннал бакIчи Сергей Меликов гьуртту хьунни Аьрщарал ва хъус-хъиншиврул комплексрал управлениялул масъаларттацIун бавхIусса стратегиялул сессиялий.
Сессия хьунни «Россия – моя история» тарихрал музейраву. Муний гьуртту хьунни исполнительный властьрал органнал каялувчитал, муниципалитетирттал бакIчитал, депутатътал, элмулул, Росреестрданул, Роскадастрданул вакилтал.
Сессия байбишин хьхьичI региондалул бакIчинал ххал дунни «Интерактивный кадастр: цифровые решения для точного измерения» тIисса выставка. Тикку дия мукунна лазерданул сканер, мобиль системартту ва цаймигу затру.
Стратегиялул сессиялий ххал дигьлай бия укунсса темарду: внедрение Национальной системы пространственных данных (НСПД), зумардацIухсса линиярттал дазурду дуруччаву, кадастрданул кьимат бищаву, территориярттал планну даву ва муниципал аьрщарал контроль.
ЦIусса зузи кIанттурду, уздансса инфраструктура ва дузалсса территорияртту – укунсса хIасиллу хьунтIий дур Дагъусттаннай НСПД-лул программа бартдигьаврийну.
Платформалул цачIун буллалиссар аьрщарал участокирттаясса, къатраясса, административ дазурдаясса, культуралул объектирдал ирсирдаясса, тIабиаьтрал территориярттаясса ва цаймигу объектирдаясса информация.
– Дагъусттан хъанай бур программа бартдигьаврил пилотный проект. Республикалун му бусравссар, амма муницIунма тIалав дуллалиссар хъуннасса жаваблувшивугу, – увкунни Сергей Меликовлул.
2021 шиная шиннай ЕГРН дуцIин давриву региондалул тамансса хIасиллу хьун дурссар. Вай давурттайну бюхълай бур гьарза дуван дачIрасса, илкинсса, ишла дуллансса аьрщарал участокру, объектирдал кадастралул кьимат лахъ буван ва налогру гьарза дуван.
«Амма жула хъунмур мурад – отчетравусса цифрарду бакъарча, республикалул ялапарлувтурансса аьямсса хIасиллур: цIусса зузи кIанттурдур, хьхьичIунсса инфраструктурар, дузалсса территориярттур, бюджетрал доходру гьарза шавур», – увкунни Сергей Меликовлул.
«Территориярттал дянив аьчухсса дазурду дакъахьурча, къабюхъайссар хьун буван цалий бавцIусса социал-экономикалул лябукку», – увкунни ванал.
Сергей Меликовлул тIимунийну, Дагъусттаннай гьарца бутIа – строительствалия байбивхьуну шяраваллил хозяйствалийн биянцIа бавхIуну бур аьрщарал ва хъус-хъиншиврул масъаларттацIун.
Сергей Меликовлул личIинурасса къулагъас дунни региондалий уттигъанну хьусса иширттах.
Региондалул бакIчинал ккаккан бунни республикалул аьрщарал ва хъус-хъиншиврул комплексравусса агьамми задачартту:
2026 шинал ахирданийннин муниципалитетирттал, шяраваллал ва шагьрурдал дазурдаясса сведенияртту лавсун къуртал буван;.
ччясса мутталий кIул буван недвижимостьрал объектирдал правообладательтал (заллухъру);
илкинсса аьрщарал участокирттал инвентаризация дуван, ми ишла дулланшиврул;
«Роскадастр» ППК-луцIунсса проект бартдигьин.
Заур Аскандаровлул аьрщарал контрольданул хIакъираву бувсунни, му чара бакъа дуван аьркинсса даву душиву, мунил кумаграйну бюхълай буну тIий ттинин мюнпат бакъа диркIсса аьрщи зузи дуван. Ванал тIимунийну, аьрщарайсса контроль – му кIанттул цилакаялувшиврул органнал тIайланмасса буржлувшивур. Парламентрал спикернал бувсмунийну, цаппара муниципалитетирттай мукунсса контроль аьркинсса даражалий сакин бувну бакъар.
Территориярттал капитализациялул хIакъираву бувсунни паччахIлугърал регистрациялул, кадастрданул ва картографиялул федерал къуллугърал каялувчинал хъиривмур Людмила Лининал. Ванил гьартану бувсунни ЕГЕРН-лувун недвижимостьрал объектирдаясса сведенияртту ласаврил давуртту республикалий бартдигьаврил хIакъираву.
ДР-лул вице-премьер, аьрщарал ва хъус-хъиншиврул арардал министр Заур Эминовлул бувсунни Дагъусттаннай дузал бувну бушиву республикалул НСПД-лул школа. Микку хIадур буллан тIий бур региондалул аьрщарал ва хъус-хъиншиврул управлениялул бутIуву зунсса пишакартал.
Сессиялул даврил хIасиллу дуллалисса махъ лавхъунни ДР-лул паччахIлугърал регистрациялул, кадастрданул ва картографиялул къуллугърал каялувчи Арсен ПирмахIаммадовлул.
Масъалартту ххал бигьавривух гьуртту хьунни республикалул премьер-министр Аьбдулмуслим Аьбдулмуслимов.
Пленар заседаниялий дурунни балжисса тапшурлугъру.
