Дагъусттаннал Халкьуннал Мажлисрал председатель Заур Аскандаров ивунни Дарбантуллал райондалийсса Мамедкъалаллал шяравун. Ва шяраваллин тамансса зараллу биян бувну бур уттигъанну ливксса тIабиаьтрал апатIрал.
ЦIанасса ппурттуву шяраву башттанма щинахьхьун лавгун бур 27 къатта, бачIи-кьачIину – 600-нниха ливчусса. ЧIумуйнусса цамур кIанайн иян увну ур сайки 3 азара инсан. Заур Аскандаров кIул хьунни шяравусса тагьарданущал, шикку тIабиаьтрал апатIрал биян бувсса зараллу бухлаган буллалиминнал давурттащал, ЯтIул ххачлил буллалисса кумагран дуркIмур инсантурайх дачIаврил низамращал.
Яла Заур Аскандаров хьунаавкьунни волонтертурал штабрал координатор Анна Безруковащал. Ванил бувсунни аьмну давуртту цукун сакин дурну дуссарив. Ванил бусаврийну, шяраваллил щинахьхьун лавгмур бутIуй мониторинг дуван захIмат хъанай бусса бур, тиккун бияншиврул аьркинну бур хасъсса пишакартал ва лодкарду. Шикку ххал бивгьунни цаймигу масъалартту.
Заур Аскандаровлул дунни цаппара тапшурлугъру, тикку гьаз бувсса циняв масъалартту дузал баву мурадрай.
