Цукунсса тагьарданий дур гражданшиврул общество Дагъусттаннай? Цукунсса масъалартту буссар мунил хьхьичI? Ци бан аьркинссар, гражданшиврул общество чялишну зуншиврул? Миннунгу, миннуцIун цаймигу суаллан жавабру лякъинсса мурадрай, ДР-лул Президентнал кIанайма Рамазан АьбдуллатIипов хьунаавкьунни ДР-лул Жяматийсса палаталул ва къакоммерциялул организациярдал координациялул советрал президиумрал члентуращал.
Хьунабакьаврий махъ лахълай, Рамазан АьбдуллатIиповлул бувсунни, гражданшиврул обществалул институт хьхьичIунмай бавриву Дагъусттаннан хъуннасса агьамшиву душаву. Ганал мукъурттийн бувну, цинявннаща бюхълай бакъар парламентравун буххан, цинявннан ччай бакъар партиярттавух хIала-гьуртту хьун, амма цинявннан ччай бур чялишну къуццу тIун, жяматийсса ва политикийсса иширттавух хIала-гьуртту хъанан, инсантурал дакIниймур щаллу буллан. «ЖучIара дур 2000-яр ххишаласса жяматийсса организациярду, жу къулагъас дулланну миннул иширттах, миннун кумаг булланну, кабакьланну. Щаллусса жяматийсса организациялун ккаллину дикIаншиврул къааьркинссар чара бакъа властьрайн къаршину дуккан. ЧIявуми масъалартту хьунтIиссар цачIу щаллу буллан, цанчирча жулва мурад бур жулва Дагъусттаннал мюхчаншиву ва цалий бацIаву», — увкунни Р. АьбдуллатIиповлул.
Р. АьбдуллатIиповлул бувсмунийн бувну, циняв масъалартту щаллу бувну бакъар. Ми давуртту дан къашайссар граждантал, гражданшиврул обществалул институтру хIала-гьуртту бакъа. Мунийн бувну, цIана жулва хьхьичIсса масъала – ми институтру бахханаххи бавур. Буруган аьркинни, цумур ххуйну зий бурив, цумунил даву гужлан дан дурив. Ганал ляличIи къулагъас дунни жяматийсса организациярдал ва ДР-лул Парламентрал хIала-гьурттусса давурттах.
Жува аьркинссар жулва тарих лахьлан ва буручлан. Тарихрал хIала-гьурттушиву дур культуралущал. «Аьвамшиву культуралияр ххув хьун дитан къабучIиссар. ЖучIава тIурча цалсса иш мукун багьну бур: аьвамшиву гьармунил ялтту лаглай дур. Жулва артистътураща, пагьму бусса инсантураща утти личIи бан къахъанай бур хъатIи цумурдив, сахIна цумурдив. Мунил ялавай бутлатиссар культуралул даража, инсантурал эстетикалул чулухуннайсса тарбия. Культуралуха зузиминнал культура лиян дуллай бур», — увкунни республикалул бакIчинал.
Ихтилат хьунни мукунма зузалт хIадур баврия. Р. АьбдуллатIиповлул мукъурттийн бувну, му масъалалуха цучIав зий акъар. Мунияту къуллугъирттай битансса инсантал ляхълай бакъар.
Яла ихтилат хьунни ниттил ва оьрчIал масъалалул хIакъираву. Жяматийсса организациярдан аьркинну бур ниттил ва оьрчIал масъалалуха зун. Республикалул бакIчинал увкусса куццуй, оьрчIал ихтиярду дуруччайсса общество дур, амма ниттилми ихтиярду дуруччаврил иширттаха зунсса организация дакъар.
«Аьркинни цIулаган дуван жулла яла ххуйми аьдатру. Бачира цаллагу жулла миллатирттал лаххиялуву буккан, янна дикIан аьркинни ххуйну дурурххусса ва къаххирасса, инсантураща ласун бюхъаншиврул», — увкунни Р. АьбдуллатIиповлул.
Гражданшиврул общество лядуккан даврия ва ганил хьхьичIсса масъаларттая ихтилат бунни ДР-лул Жяматийсса палаталул председатель ХIамзат ХIамзатовлул.
Хьунабакьаврил хIасиллу дунни ДР-лул Президентнал кIанайма Рамазан АьбдуллатIиповлул.
