Гьарцагу бусурманчувнан ххирасса, зурдардиву яла бусравсса Рамазан барз рувхIанийшиврул чулухагу шайссаксса мюнпатну, ванищала цIуллу-сагъшиврунгу зарал къахьунну гьан буваншиврул цаппарасса кIанттурду дакIнин бичинну.

Дайдихьу №6

РувхIаниймуния

Алжаннул къапурду тIитIайсса, дуржагьралми лакьайсса, Хъунасса Аллагьнал цала лагътурай ляличIиссава цIими бишайсса, дурмунихлусса чири, бахшиш хъуннасса ва зуруй Аллагьнал цIа шайссаксса чIяруну зумух ласлай, дуаьрду дуллай хъинссар.

* * *
Зума дургьуманан дукра дуллунан цалла зума дургьуссаксса чири буссар. Зума итадакьин цайминнайн оьвчинсса, дукра дувансса каши, сант дакъахьурчангума, буллусса чассаг, щинал, накIлил ххув вава ххуллий кьамулссар.

* * *
Ва зуруйгу хъунмасса чири буссар ятинтураха аякьа дуллалиминнан. Муданнасса аякьалийн ласунсса каши дакъахьурча, арцуйну, дуки-хIачIиялийну, иширайну ягу хъинсса мукъуйну шайссаксса кумаг бувну хъинссар.

* * *
Ва зуруй хаснува хIарачат буван аьркинссар мюнпат бакъамуниха, бунагьмуниха къазун, чIун оьнна гьан къадуллан, дакI марцI, иман цIакь дуванмуниха зун.

* * *
Багьа бакъасса Рамазан зурул гьантри (шинал 354 гьантлувасса бувагу 30 гьантта), ссятру зущара телевизор, телефон, карчI ва цаймигу цIарду дусса «цуркинтрал» зеххин, дацин мабацIару.

Дуки-хIачIиялия

Зума дургьуну, щаллусса кьини дачIра диркIсса ххютукалун дяркъусса щин заралссар, мунияту, зума итадакьлакьисса чIумал, чассагул хъирив хIачIлачIисса щин гъилисса дикIан аьркинссар.
Чассагуйну ва щинайну зума итадаркьуну махъ дукра най дуна дуркунугу къахъинссар. Чакгу бувну, цаппарасса чIун ларгун махъ дукарча хъинссар.

* * *
Зума итадаркьуну махъсса дукра дайдирхьуну хъинссар куклусса накьлия, бульондалия ва салатирттая. Цал архIал кIира-шанна журасса дукра дуркуну къахъинссар, ванийну чурххайн гуж багьлагьиссар.
Зума итадаркьуну махъ дукра канансса ряхрагу-аруллагу ссятрал лахъишиврий, цал царай канай, шамийлла дукра дукансса чIун хьунтIиссар.
* * *
Сухурданун дуркуну хъинссар ччяни ккашигу биян къабантIисса, мунищала архIал мякьгу багьан къабувансса, чурххан щаллусса кьини биял хьунуксса гуж буллалисса дукра: хъаласса иникьаллуя, нехълуя, хъюруврая, ппиринжрая дурмур, яни клетчаткалул аваданмур, мукунма турт, ницI, лагаву, ккунук, авокадо.

* * *
Аллагьнаясса барачат ххисса сухурданийн бивзун хъинссар. Уттуишиннин уччиннин дукра дукав, сухурданийн къаизланшиврул тIиссагу шай. Ва къатIайлассар. Сухурданийн изаврил цамур мяъна-мурад буссар, ва суннатссар, ванийну барачат ххи шайссар. Дукра дукансса тамахI ягу чIун дакъахьурчангума, сухурданун шанма чассаг букаву ва ялун щинал стакан хIачIаву гьассар.
Бусравсса Рамазан барз лайкьсса даражалий гьан бувансса каши дулуннав жухьхьунна Хъунасса Заннал.

ХIадур бувссар
Бадрижамал Аьлиевал