МахIачкъалалив дякъил ццихь чурххавун кьутIлатIисса февральданул кьини, зузи кьини компьютердануха къабивзун гьан дувайхту, маркIачIанмай цахъис хIаллайсса бунугу гьавалийн буккан ччайгу бурхха, хьхьиригу чIаравва бухьувкун.

Махъ ппурттуву Редукторный поселокрайсса хьхьирил зуманицI шагьрулул агьлугу, хъамалгу ххуйну бигьалагансса давуртту дунни. Агьали тиху-шихунмай занансса лахъисса тIаннул ххуллу-ламу (ванийн променад учай) бунни, цаймигу къулайсса шартIру дузал дунни.

Та кьини сайрданий буккайхту, ттул я бавцIунни тIаннул ламуй бувсса исвагьисса ччитул къатлуй. Та чIиви къатлул ца чулух дия чичру: «Ччитри бяхълай чIалай буну, бувсса къаттар, агар ва букьан ччан бикIарча Набережнайлул ялттубуккултран, экьимабутару, ва номерданий ттучIан оьвчара». Бия усттарнал номергу ккаккан бувну. Буниялттунгу, гьашину кIинтнил жунма ккаккан бунни цурда МахIачкъалалийнгу дучIайшиву. Тай бявкъусса гьантрай ччитран ( ми хьхьирил зуманицI чансса къабикIай, инсантурал кьариртсса дукиялул ххиличIлурдал хъирив багьсса) бучIи хьуссар ва къатта.

На укунсса пикрирдаву бунува, кIива душгу гъан хьунни ччитул къатлучIан, чантайлува дуккан дурну, вискасру кьатI дунни. На душваврахь цIувххуссия: «Та къатта та бувссарив кIуллив?» – куну. «Жун та бувссарив къакIулли, зурул хьхьичIва хIисав хьунни, жу ччя-ччяни бучIару вайннун дуканмур ларсун, ччитри бучIай, буччайхту ялагу сайрданий лагай», – увкунни душваврал тяхъану. Вайннул тяхъашиврул таза дуккан дурсса дакIнищал гихунмай бавчура. Биялсса манзил битайхту, тIаннул ламуй бакIрайн багьунни лув бишай кIану – стул. Вагу личIлулсса инсаннал аякьалийсса даву. Биялсса скамейкарду бур променадрал ххуллий, ванил лахъишиву 1000 метра дур, тIаннул къатIа бивхьуну бия, гьамин скамейка бакъасса биялсса манзил бусса кIанай. Набережнайлул проектрал автортурал гъалатI дакI ххуйсса инсаннал тIайлабацIан бувну бия.

Дия МахIачкъалалив чIяруну къадикIайсса, дякъил ццихь чурххавун кьутIлатIисса кьини. Ххуйсса инсантурал дурсса хъинсса давурттал ттулмур дакIгу гъилисса асардал дуцIин дурна. Жунна мудангу, хIакьинугу яла диял къахъанахъимургу духьунссар хъиншиву, хъинбала. Хъинбала буванми чан бакъасса дуниял миннайнугу чаннассар. Барчаллагь ттухьгу, цайминнахьгу хъиншиврул дарс дирхьусса кIул бакъасса инсантурайн.

ПатIимат Рамазанова