Гъумучиял школалул актовый залдануву хьунни «Зимняя сказка» тIисса творческий конкурсрай ххув хьуминнан бахшишру дуллалисса шадлугъ. Ваний гьуртту хьунни дуклаки оьрчIру, нину-ппу, учительтал ва бусравсса хъамал.

Конкурсрай оьрчIал дурсса, урувгма хIайран ансса кIинтнин хас дурсса караматсса давурттал залдануву хIасул дурну дия магьлул дуниял. «Давуртту ххал дуллалисса гьар базилухь на хIайран увну личIара зул гьунардал, – увкунни райондалул бакIчи Зураб Куччаевлул. – Ва конкурс укунма оьрчIал дянивсса бяст-ччал бакъар. Ва жула кулпатру цачIун хьуну, унгу-унгусса караматшиву хIасул дан бюхъайшиву тасттикь буллалисса ишри. Зул гьунардур жула райондалул яла багьа бищун къашайсса хъус. Барчаллагь зун хIакьсса магьлухлу».

Давурттан кьимат бишлай бия райондалул администрациялул ва кIулшиву дулаврил идаралул зузалт.
Давурттал даража лавайсса бушиврийн бувну, хIукму бувну бия бахшишру дулунсса кIанттурду гьарза бан: шанма цалчинмур, шанма кIилчинмур, шанма шамилчинмур ва «Приз зрительских симпатий».
Ххувхьуминнан бахшишру дуллунни Зураб Куччаевлул, ванал хъиривчутурал: Эльмира МахIаммадовал ва Малик ХIусмановлул, КIулшиву дулаврил управлениялул каялувчи Сулайман Шахмиловлул.
Ахирданий школалул директор Соня Макьаевал барчаллагь увкунни райондалул каялувчитурахь творчествалул сиптардан кабакьугу бувну, оьрчIан хъуннасса байран хIасул даврихлу.

«ДакIнийхтуну барчаллагь тIий бура райондалул администрациялухь, оьрчIал гьунарду ккаккан бансса конкурс сакин даврихлу. Барчаллагь оьрчIан ва вайннал нитти-буттан бувсса захIматрахлу, гьавасрахлу, творчествалухсса ччаврихлу», – увкунни ванил.
Ххувхьуминнан бакъасса, конкурсрай гьуртту хьусса цинявннан райондалул администрациялул чулуха дуллунни грамотартту ва бахшишру.