Авгъан дяъвилул ветерантал барча буллай Дагъусттаннал бакIчи Сергей Меликовлул кIицI лавгунни ацIра шинай лахъи лавгсса террористътуращалсса дяъвилий бургъил ччуччин дурсса авгъаннал аьрщарай, жандалия ка ларсун, кьянкьану бавцIуну бивкIшиву жула аьралийтал.
– ХIакьину жува дакIнин бичлачиссару душманнайн данди бавцIуну, цала бурж лайкьну бартбивгьусса аьралийтал. ДакIнилгу, чурххалгу цIунцIиярттаяр ххув хьуну, паракьатсса оьрмулийн кIурабаен бювхъуми. Жяматийсса оьрмулуву чялишну гьуртту хъанахъими, жагьилминнал тарбиялул ялув бавцIуми. Вай эбратну хьусса, вайннал тарбия бувсса жагьилталгу хIакьину хасъсса аьралий операциялий гьуртту хъанай, чувшиву ккаккан дуллай бур.
ХIакьину жува лахъа-хъун буллалиссару дунияллул личIи-личIисса кIанттурдайсса питнарду паракьат буллай, яхIирай цала бурж лавхъсса аьралийтал-интернационалистътал, – увкунни республикалул бакIчинал.
Дагъусттаннал ХIукуматрал председатель Аьбдулмуслим Аьбдулмуслимовлул барча бунни интернационалистътал
Дазул кьатIув къуллугърал бурж бартбигьлай бивкIсса аьрасатлувтал дакIнин бичлачисса кьини, Дагъусттаннал ХIукуматрал председатель Аьбдулмуслим Аьбдулмуслимовлул барча бунни дагъусттанлувтал-интернационалистътал.
– ХIурмат бусса ветерантал-интернационалистътал, Авгъанисттаннайсса аьралий иширттал гьурттучитал, локальный питнардал ветерантал! ХIакьину жува дакIнин бичлай буру Ватандалул кьатIув чувшиврий аьралий бурж лавхъсса аьрасатлувтал. Зувинния ливчусса локальный дяъвирдаву ва ярагъуннищалсса питнардаву гьуртту хьуссар жула ватанлувтал. Дунияллул халкьуннал дянивсса билаятрал бигарду бартбигьлай, союзниктуран аьралий кумагру буллай, Аьрасатнал мурадру буручлай, вайннал ккаккан дурссар хIат-хIисав дакъасса чувшиву. Жунма пахру буссар захIматсса иширттаву, бигьа дакъасса шартIирдай къучагъшиву ккаккан дурсса ватанлувтурая. Вай иширттаву жанну харж дурми ялун нанисса никиран мудан дакIний бикIантIиссар, – увкунни Аьбдулмуслим Аьбдулмуслимовлул.
Андриана Аьбдуллаева
