Инсаннайх кьини дурксса чIумал, хъиннува чIалан бикIай лагма-ялттунал, жяматрал хIал. ЛяличIисса чумартшиву чIалачIи дунни Ккурккуллал жяматралгу, вайннацIун цайминналгу, январь зурул 9- нний шяраву ахIвал кIюласса кулпат къатри ччурччуну, кьурукIинттул кьатIув ливчIсса чIумал.
Ва кулпатран кумагран арцу датIлатIисса чIумал, хIала бувххунни, цивппа ккурккул бакъассагу, чIявусса цаймигу дакI цIуцIисса инсантал. Цалчинсса гьантрайва 50 азарда къуруш дирчуна Растиван Беков бакIчисса ТтурчIиял жяматрал ккурандалул.
Уттигъаннурив, кIива миллион щаллу бан 50 азарда къуруш диялну дакъасса бавну, вайннал цал ттигу дирчунни микссара арцу. ТтурчIиялгу, Ккурккуллалгу мудангу, зунттава бизаннин хъиннура, уссушиврийсса дахIаву диркIссар, чансса къабивкIссар хIаласса ташурдугу. Ва иширавугу ттурчIи ккурккуллал чIарав ххуйну бавцIунни.
КIицI лаган ччива цамургу зат. ЧIирисса чIумул дянив циняв лагма лавгун, ца хьуну, шайнал шаймур дичлай, зарал бивсса кулпатран ххуйсса кумаг бувсса ккурккуллал жяматрал чумартшиву асар хьуну, чIярусса шиннардий виваллил иширттал органнаву зий ивкIсса Хъусращиял шяравасса Бахьулавхъал ХIажикьурбаннул (ва Ккурккуллал куяври) чивчуну бур укунсса шеъригу:
Зу хъиннура лахъ дунни
Зуятура диркIсса цIа,
Кьини дурккусса чIумал
Кумаграл ка тIиртIуну.
Ккурккуллал ккурандалул
ЧантIа тIутIи дурунни,
Лагмацири щархъурду
Багьу-бизу ккаккан бувну.
Жяматрал цIа лахъ шайсса
ЧIявушиврийну дакъар,
Инсаннал цIа лахъ дайсса
Цала узданшиврулли.
На барчаллагь тIий ура
Вай Ккурккуллал жяматрахь,
Кьини дурккусса чIумал
ЧIарав бацIан хIадурсса.
КIицI лаган, ХIажикьурбаннул кулпат Лидиягу мудан гьуртту шайссар цумур-цагу ихIсандалул давривух. Барчаллагь ХIажикьурбаннунгу, ТтурчIиял жяматрангу, цинявппа канийну, мукъуйну чIарав бавцIуминнангу. Каши ххи даннав, бюхълай личIаннав.
Андриана Аьбдуллаева
