Февральданул 6-нний МахIачкъалаллал хъун майданнив хьунни «Хоровод дружбы» цIанилусса къавтIаврил флешмоб. Ванил сакиншинначину бия Дагъусттан Республикалул Культуралул министерство.

Хоровод хьунни Аьрасатнал Халкьуннал цашиврул шинал шадлугъирттал лагрулий. Ваний гьуртту хьунни паччахIлугърал «Лезгинка», «Молодость Дагестана», «Дагестан», «Каспий», «Айланай» ансамбльлу, Культуралул ва искусствардал колледжрал студентътал, «Горцы Кавказа» ва «Кизилюрт» ансамбльлал чIава къавтIалт, республикалул циняв миллатирттал вакилтал.

Вай бия жулла республикалий ялапар хъанахъисса миллатирттал аслийсса яннардаву. КъавтIаву хьунни Мурад Къажлаевлул музыкалухун.
КъавтIаврил флешмобрал цал ххишалану ккаккан дунни жулва билаятрал халкьуннал культуралул ва аьдатирттал аваданшиву.

Шадлугърайн бувкIун бия Дагъусттан Республикалул ХIукуматрал председательнал хъиривчув Муслим Телякавов, республикалул культуралул министр Зарема Буттаева, республикалул кIулшиву дулаврил ва элмулул министр ЯхIия Бучаев.

Бадрижамал Аьлиева