Февраль зурул 24-нний 2022-ку шинал билаятрал мурадру ва жулва халкь буруччаврил цIаний Аьрасатнал баян бувссар Украиннал аьрщарай хасъсса аьралий операция. Гьашину мукьра шин хъанай дур операция най, къучагъсса жулва вирттал хьхьичI ххуттай бавцIуну Ватандалул тапшур бувмур лайкьну бартбигьлай. ВаницIун бавхIуну бишлай буру Аьрасатнал Обороналул министерствалул чулухасса, хасъсса аьралий операциялий Аьрасатнал Виричунал цIа цалчин ларсъсса НурмахIаммад ХIажимахIаммадовлуясса текст.

Цалва 25 шинавусса­ оьр­му­­лу­ву хъунама лейте­нант Ну­махIаммад ХIажи­махIам­мадов кIийла лавгссар Сириянавун аьра­лий командировкарттай. Аьрасатнал аьралуннал группировкалуву бартбигьлай ивкIссар тийх билаятрал тапшур бувсса бигарду. Хасъсса аьралий операция байбивхьусса чIумал, роталул командир хIисаврай ва къуллугъ буллалисса десантно-штурмовой полк яла цIу къизгъиннийн тIайла бавцIуссар. Десантниктурал колонналийн гьужум бувссар цукссагу гуж ххишаласса душманнал, цалагу укунмасса инсантал хьхьичIун бавкьуну.

Роталул командир нанисса аьралий машина душманнал цIарахьхьун биривссар. НурмахIаммадлул амру бувссар экипажрайн лагма бавцIуну, душманнан жаваб дулун. Амма гужру архIалсса бакъашиврийн бувну, аьралийтураща душманнайн данди бацIан къавхьуссар. Му чIумал командирнал, аьралийтурайнгу нигьачIаву дакъанийн лихъан амру бувну, тай арх буцаннин цана цувалу душманнащал талай авцIуссар. Щавурду дирсса чIумалгу, ца ша махъунмай къалавсун, кьянкьану талай ивкIссар къучагъсса командир. Нацистътал хъиннува гъан хьуну, цува ясир угьан ччисса бувчIукун, махъра-махъсса граната дурккун, цувагу, лагмасса боевикталгу пIякь учин був­ссар.

Оьрмулуву НурмахIаммадлун эбратну хьуссар ххаллилсса нину ва ппу. Ппу – полициялул хIаписар, кьянкьасса чув-адамина,чIярусса аьралий наградарттал кавалер. Нину – учительница, Дагъусттаннай хIурматрайсса хъамитайпа. НурмахIаммадгу мудан бусравсса нитти-буттал цIа яларай къадан, вайннан лайкьну икIан, гьарица ишираву жаваблувшиву дуну сукку тIун хIарачат буллай ивкIссар.

Спортрахун машхул хьусса НурмахIаммадлул хьхьичIунсса кIанттурду бугьайсса бивкIссар республикалул ва билаятрал даражалийсса единоборстварттал турнирдай. Воздушно-десантный къуллугърах эшкьи хьуну, Рязаннал лавайсса даражалул воздушно-десантный командный училищалувун увхсса НурмахIаммадлул, дуклай унува ларсъссар каруннай бияврил спортрал мастернал цIа.

Личный делалувусса суратрай чIалай ур кьянкьасса, сивсусса, цIарал пар нанисса цIансса яруннищалсса жагьил. Суратрах бурувгун къачIалай дур ванал зат асар шайсса хасият. НурмахIаммадлун ххирасса бивкIун бур шеърирду, цалагу чичайсса бивкIун бур. Яхьуну дур видеозапись, ванал пасихIну ва бюхханну цала шеърирду ккалаккисса. Ми бур хъиншиврия, тIайлашиврия…

Ппу хасъсса аьралий операциялийсса чIумал дунияллийн бувксса НурмахIаммадлул душнин ва зуруй мукьра шин хьунтIиссар. Къаккаркссар чIивитIун буттал лажин, къакьисмат хьуссар ва цала гуж-кьуват бусса каруннил бугьан НурмахIаммадлун. Ванал жан дуллуссар цала душнилгу, жува цинявнналгу паракьатну оьрму бутланшиврул.
Аьрасатнал президентнал­ хIук­му­лийну хъунама­ лейтенант НурмахIаммад ХIажи­махIаммадовлун аьпалул хьуну махъ Аьрасатнал Виричунал цIа дуллуссар. Ва хьуссар хасъсса аьра­лий операциялий цалчин ва награда ларсъсса аьралийчу.

ХIадур бувссар
Андриана Аьбдуллаевал